Toshkent shahar yo‘lovchi transportida nazorat yanada kuchaytirildi. Transport nazorati inspeksiyasi va yo‘lovchi transporti nazorat boshqarmasi xodimlari hamkorligida avtobuslarda reydlar muntazam o‘tkazilmoqda. Bu haqda mas’ul idoralar ma’lum qildi.
Yil boshidan beri poytaxtda olti mingdan ortiq yo‘lovchi chiptasiz sayohat qilgani uchun ushlangan. Har bir holat yuzasidan ma’muriy bayonnoma rasmiylashtirilgan.
Ma’lumotlarga ko‘ra, jarima miqdori BHMning 1/10 qismi — 41 200 so‘mni tashkil etadi. Bu esa avtobus yo‘l haqi — 1 700 so‘mdan qariyb 25 baravar qimmat hisoblanadi.
Qizig‘i shundaki, yanvardan avgustgacha bo‘lgan 7 oyda salkam 4 ming yo‘lovchi qoidabuzarlik qilgan bo‘lsa, keyingi bir yarim oyning o‘zida 2 mingdan ortiq “quyon” aniqlangan. Bu holat yo‘l haqini to‘lamaslik holatlari ortib borayotganidan dalolat bermoqda.
Shu bilan birga, qonunbuzarlik takrorlanganda javobgarlik yanada og‘irlashadi. Ma’muriy javobgarlik kodeksining 144-moddasiga muvofiq, yo‘lovchining chiptasiz sayohati uchun uch BHM — ya’ni 1 236 000 so‘m miqdorida jarima belgilangan.
Mutasaddilar ta’kidlashicha, nazorat tadbirlari davom etadi va barcha yo‘lovchilardan yo‘l haqini o‘z vaqtida to‘lash qat’iy talab qilinadi.
“Zamin”ni Telegramʻda oʻqing!
