O‘zbekistonda tug‘ilish ko‘rsatkichlari yuqori darajada saqlanmoqda — har daqiqada ikki nafar chaqaloq dunyoga kelmoqda, deb xabar berdi oila-gen.uz.
Oila va gender ilmiy-tadqiqot instituti ma’lumotlariga ko‘ra, 2024 yil davomida mamlakat bo‘ylab 926,4 mingdan ortiq chaqaloq tug‘ilgan. Bu raqamlar statistikadan tashqari, aholining o‘sish sur’ati, oilalar soni va yosh avlod ulushining ortib borayotganini ko‘rsatadi.
Tahlillarga qaraganda, har kuni o‘rtacha 2531 nafar yangi tug‘ilgan bola dunyoga keladi. Bu esa har soatda 105 nafar, har daqiqada ikki nafar va taxminan har 34 soniyada bir chaqaloq tug‘iladi, degani.
Qiyos uchun: Qozog‘istonda bu ko‘rsatkich har daqiqada 0,6 nafarni, Tojikistonda 0,5 nafarni, Qirg‘izistonda 0,3 nafarni tashkil etadi. Turkiyada har daqiqada 3 nafar, Germaniya va Fransiyada 1,4 nafardan, Xitoyda 17, Hindistonda esa 43 chaqaloq dunyoga kelmoqda.
Institut mutaxassislari ta’kidlashicha, bu raqamlar shunchaki statistika emas. Ular mamlakatda oila instituti mustahkamlanayotganini, yoshlar ulushi yuqori ekanini va demografik o‘sishning faol bosqichi davom etayotganini anglatadi.
Shu bilan birga, mutaxassislar demografik o‘sish mehnat bozori, ta’lim tizimi va ijtimoiy infratuzilmalarga bo‘lgan talabni ham ortishiga sabab bo‘lishini qayd etmoqda. Ya’ni, bugungi chaqaloqlar — ertangi kunning yosh kadrlari, ustozlari va mutaxassislari.
Demograflar fikricha, O‘zbekiston hozir “demografik dividend” davrini boshdan kechirmoqda — ya’ni ish qobiliyati yuqori bo‘lgan yosh aholi ulushi ko‘payib, iqtisodiy o‘sish uchun yangi imkoniyatlar yaratilayotgan bosqichda turibdi.
Mutaxassislar ta’kidlamoqda: oilalar sonining ko‘payishi nafaqat statistik o‘sish, balki ijtimoiy barqarorlik va millatning kelajak salohiyatini ham belgilaydi. Chunki har bir chaqaloq — bu yangi hayot, yangi umid va mamlakatning ertasiga qo‘shilayotgan qimmatli hissadir.
“Zamin”ni Telegramʻda oʻqing!
