O‘zbekiston tog‘laridagi muzliklar so‘nggi yillarda sezilarli darajada qisqarayotgani kuzatilmoqda. Mutaxassislarning ma’lumotiga ko‘ra, atigi ikki yil ichida muzlik qalinligi 5 metrdan ortiq kamaygan. Faqat joriy yilning o‘zida esa muzliklar qariyb 4 metrga erib ketgani qayd etilgan. Bu holat tog‘ ekotizimiga, suv zaxiralari va iqlim muvozanatiga jiddiy ta’sir ko‘rsatishi mumkin.
Mutaxassislar fikricha, muzliklarning bunday tez erishi bir necha omillar bilan bog‘liq. Eng asosiy sabab — global isish jarayonining kuchayishi. Harorat yil sayin ortib borayotgani natijasida muzliklar o‘z massasini yo‘qotmoqda. Shuningdek, yog‘ingarchilikning kamayishi va atmosfera haroratining o‘rtacha ko‘tarilishi ham jarayonni tezlashtirmoqda.
Muzliklarning qisqarishi O‘zbekiston uchun strategik ahamiyatga ega bo‘lgan suv resurslariga bevosita ta’sir qiladi. Tog‘larda to‘plangan muzlar yoz oylarida daryolarga suv manbai bo‘lib xizmat qiladi. Agar muzliklar hozirgi sur’atda erishda davom etsa, kelajakda suv tanqisligi kuchayishi mumkinligi haqida ogohlantirilmoqda.
Ekologiya bugungi kunda nafaqat O‘zbekiston, balki butun insoniyat oldida turgan eng dolzarb muammolardan biri. Mutaxassislar tabiatni asrash, resurslardan oqilona foydalanish va atrof-muhitga zarar yetkazuvchi omillarni kamaytirishni eng ustuvor vazifa sifatida ko‘rsatmoqda. Tabiatni asrash bo‘yicha bugungi kunda qilinadigan har bir amaliy ish kelajak avlodlar hayoti uchun katta ahamiyat kasb etadi.
“Zamin”ni Telegramʻda oʻqing!
