Yangi yil bayramlari arafasida O‘zbekistonga tashrif buyurayotgan xitoylik sayyohlar soni keskin oshdi. Mutaxassislar ta’kidlashicha, joriy yil boshida Xitoy fuqarolari uchun vizasiz rejim joriy etilgani turistik oqimning ikki baravar ko‘payishiga asosiy turtki bo‘ldi.
Turizm qo‘mitasi Sinxua axborot agentligiga tayanib xabar berishicha, 1–3 yanvar kunlari Xitoydan O‘zbekistonga aviachiptalarni bron qilish ko‘rsatkichlari o‘tgan yilning shu davriga nisbatan ikki barobarga oshgan.
Mutaxassislar bu ijobiy tendensiyani vizasiz sayohat imkoniyati bilan bog‘lamoqda. Yangi tartib sayohatni ancha yengillashtirib, qisqa muddatli dam olish yoki madaniy safarlar uchun mavjud bo‘lgan byurokratik to‘siqlarni kamaytirdi.
Bundan tashqari, Xitoyda yaqinda yakunlangan “O‘zbekiston – turizm yili” doirasida mamlakatimizning boy madaniy merosi va sayyohlik imkoniyatlari keng targ‘ib qilingani ham qiziqish oshishiga xizmat qilgan. Shu bilan birga, ikki davlatning yirik shaharlari o‘rtasida to‘g‘ridan to‘g‘ri aviaqatnovlar sonining ko‘payishi sayohatchilar uchun yanada qulay sharoit yaratdi.
Ma’lumotlarga ko‘ra, xitoylik mehmonlar asosan Samarqand, Buxoro va Xiva kabi tarixiy shaharlarni o‘z ichiga olgan an’anaviy turistik yo‘nalishlarga ustuvor ahamiyat bermoqda. Bu esa O‘zbekistonning jahon turizm xaritasidagi nufuzi tobora ortib borayotganidan dalolat beradi.
“Zamin”ni Telegramʻda oʻqing! 
Ctrl
Enter
Xato topdIngizmi?
Iborani ajratib Ctrl+Enter tugmasini bosing 
