O'zbekiston Respublikasi Prezidenti Shavkat Mirziyoyev cheklangan javobgarlikdagi jamiyatlar (ChJJ) to'g'risidagi qonunning yangi tahririni imzoladi. Adliya vazirligi tomonidan tayyorlangan ushbu hujjat mamlakatda korporativ boshqaruvning zamonaviy standartlarini joriy etish, ChJJ faoliyatini tartibga solishdagi huquqiy bo'shliqlarni bartaraf etish hamda jamiyat ishtirokchilarining huquqlarini yanada mustahkamlashga qaratilgan. Bu haqda Uzdaily.uz xabar beradi.
71 moddadan iborat bo'lgan yangi qonun rasmiy e'lon qilinganidan uch oy o'tgach kuchga kiradi. Hujjatni ishlab chiqishda mahalliy va xorijiy ekspertlar, jamoatchilikning takliflari hamda xalqaro tajribalar hisobga olingan.
Qonunda jamiyatning kuzatuv kengashi vakolatlari va uning a'zolarini saylash tartibi aniq belgilab qo'yildi. Bu korporativ nizolarning oldini olishga xizmat qiladi. Shuningdek, kuzatuv kengashining yig'ilishlarsiz, masofadan turib qaror qabul qilish imkoniyati yaratildi.
Qonun birinchi bor kuzatuv kengashi va ijro organlari a'zolarining fidusiar majburiyatlarini tasdiqlaydi, bu xalqaro korporativ boshqaruv amaliyotiga mos keladi. Bundan tashqari, jamiyatlar faoliyatining huquqiy asoslari kengaytirildi, jumladan, faqat litsenziyalar asosidagina emas, balki boshqa ruxsat berish va xabardor qilish tartiblari doirasida ham ishlash imkoniyati paydo bo'ldi.
Filiallar, vakolatxonalar hamda sho'ba va qaram korxonalarni tashkil etish masalalari alohida tartibga solindi. Qonunda ustav kapitaliga hissasini kiritmagan va jamiyat faoliyatiga to'sqinlik qilayotgan ishtirokchilarni chiqarib yuborish mexanizmlari nazarda tutilgan. Shuningdek, ishtirokchilar o'rtasidagi ulushlar bo'yicha sud nizolari davrida ustav fondini o'zgartirishga cheklovlar qo'yishga ruxsat berildi.
Hissalarni Markaziy qimmatli qog'ozlar depozitariysi orqali hisobga olish, ozchilik ishtirokchilari qo'mitasini tuzish hamda audit va manfaatdor shaxslar bilan bitimlar bo'yicha normalarni takomillashtirish imkoniyatlari ko'zda tutilgan. Yangi tahrirdagi qonun ishtirokchilar huquqlarini himoyalashni kuchaytirish, ulushlarni noqonuniy o'zlashtirishni oldini olish, investitsiya muhitini yaxshilash va xorijiy investitsiyalarni jalb qilish, shuningdek, mamlakatda yanada shaffof va barqaror korporativ muhitni shakllantirishga qaratilgan.
“Zamin”ni Telegramʻda oʻqing!
