“Uzgidromet” tomonidan 6-may kuniga mo‘ljallangan ob-havo ma’lumoti e’lon qilindi. Unga ko‘ra, mamlakat bo‘ylab havo harorati asta-sekin ko‘tarilib, ayrim hududlarda 38 darajagacha isishi kutilmoqda.
Jumladan, Toshkent shahrida havo kam bulutli bo‘lib, yog‘ingarchilik kuzatilmaydi. Shamol sharq tomondan 3–8 metr/sekund tezlikda esadi. Kechasi 16–18 daraja, kunduzi esa 30–32 daraja atrofida bo‘ladi.
Qoraqalpog‘iston Respublikasi va Xorazm viloyatida havo o‘zgaruvchan bo‘lib, ayrim hududlarda qisqa muddatli yomg‘ir va momaqaldiroq ehtimoli bor. Shamol tezligi 7–12 metr/sekundga yetib, ba’zi joylarda 18 metr/sekundgacha kuchayishi, hatto chang-to‘zonlar kuzatilishi mumkin. Harorat kechasi 17–22, kunduzi 30–35 daraja bo‘ladi.
Buxoro va Navoiy viloyatlarida asosan yog‘ingarchilik kutilmaydi, biroq shamol ba’zan kuchayishi mumkin. Harorat kechasi 15–20 daraja, kunduzi 30–35 daraja atrofida saqlanadi.
Toshkent, Sirdaryo, Jizzax va Samarqand viloyatlarida ham havo quruq va biroz bulutli bo‘lib, kunduzgi harorat 30–35 darajagacha ko‘tariladi.
Qashqadaryo va Surxondaryoda esa eng yuqori ko‘rsatkichlar kuzatilib, havo 33–38 darajagacha isishi kutilmoqda.
Farg‘ona vodiysi hududlarida (Andijon, Namangan, Farg‘ona) havo nisbatan yumshoq bo‘lib, kunduzi 28–33 daraja atrofida bo‘ladi.
Tog‘oldi va tog‘li hududlarda esa havo salqinroq — kechasi 10–15, kunduzi 17–22 daraja bo‘lishi kutilmoqda.
Sinoptiklar ta’kidlashicha, 5–8-may kunlari davomida respublika bo‘ylab harorat bosqichma-bosqich oshib boradi.
