Arrigo Sakki: «Anchelottini tanqid qilishdan oldin, u kim ekanligini eslashingiz kerak!»

Italiya futbolining afsonaviy shaxslaridan biri, «Milan»ning sobiq bosh murabbiyi Arrigo Sakki «Real Madrid» ustozi Karlo Anchelotti haqidagi tanqidlarga javob berdi. Ma’lumki, madridliklar Chempionlar ligasining chorak finalida «Arsenal»ga ikki o‘yin natijasiga ko‘ra (0:3 va 1:2) mag‘lub bo‘lib, musobaqani tark etgan edi.

«Bu tanqidchilar Anchelottining kimligini haqiqatan ham biladilarmi? U qanday sovrinlarga erishganini anglaydilarmi? Men uni faqat qo‘lga kiritgan sovrinlari uchun emas, balki inson sifatidagi ajoyib fazilatlari uchun ham haqiqiy maestro deb hisoblayman. Madridning «Real» klubi Karletto kabi buyuk shaxs bilan xayrlashishdan oldin yaxshilab o‘ylab ko‘rishi shart», — dedi Sakki mashhur «La Gazzetta dello Sport» nashriga bergan intervyusida.

Sakkining ta’kidlashicha, bu mavsum Anchelotti va «Real» uchun juda qiyin kechdi. Karlo ko‘plab asosiy futbolchilarning jarohatlari tufayli deyarli har bir o‘yinda tarkibini qayta shakllantirishga majbur bo‘lgan.

«Futbolda bu kabi holatlar sodir bo‘lib turadi, ammo Karlo kabi buyuk mutaxassisning tanqid qilinishi meni qattiq ranjitadi. Uning bu mavsumdagi tarkibiga nazar tashlang – aksariyat uchrashuvlarda u o‘z pozitsiyasidagi asosiy himoyachilarsiz harakat qilganini ko‘rasiz. Bu ham oson ish emas va har qanday murabbiy uchun og‘ir sinovdir», — deb qo‘shimcha qildi mashhur murabbiy.

Arrigo Sakki o‘z nutqida Anchelotti kabi murabbiylarning qadrini bilish va ularning qiyin vaziyatlardagi faoliyatini adolatli baholash kerakligini yana bir bor uqtirib o‘tdi. “Zamin”ni Telegramʻda oʻqing!