Turkiyaning nomdor klubi — “Fenerbahche” hujum chizig‘ini yangi yulduz bilan mustahkamlash niyatida. “Fotomaç” nashri yozishicha, jamoa Karim Benzemani joriy mavsum yakuniga qadar o‘z safida ko‘rishni rejalashtirmoqda.
Manbalarga ko‘ra, jamoa bosh murabbiyi Domeniko Tedesko klub prezidenti Sadettin Saranga hujumda samaradorlikni oshirish uchun yangi forvard zarurligini ma’lum qilgan. Bu ehtiyoj bir necha omil bilan bog‘liq — Yussef En-Nesirining beqaror formasi, Jon Dyuranning jarohati va Jenk Tosunning tarkibdan chiqarilishi.
Shu sababli, muhokama qilingan bir nechta nomzodlar ichida eng maqbul deb Karim Benzema tanlangan. Frantsiyalik hujumchining “Al-Ittihod” bilan tuzilgan shartnomasi joriy mavsum oxirida yakunlanadi, bu esa transferni amalga oshirishni ancha yengillashtiradi.
Ma’lumotlarga ko‘ra, “Fenerbahche” rahbariyati yaqin haftalarda Benzemaning agentlari bilan aloqa qilishni rejalashtirmoqda. Agar muzokaralar ijobiy natija bersa, transfer rasmiy yo‘lga qo‘yiladi.
Avvalroq, 37 yoshli Benzema faoliyatining so‘nggi bosqichini Yevropada davom ettirishni xohlayotganini bildirgan edi. Bu esa “Fenerbahche” uchun katta imkoniyat bo‘lishi mumkin — jamoa tajribali forvard bilan shartnoma imzolab, chempionlik yo‘lida yanada kuchayishi mumkin.
Turk nashrlari ta’kidlashicha, agar Benzema “Fenerbahche”ga kelsa, u klub tarixidagi eng nufuzli hujumchilardan biriga aylanadi. Hozircha muzokaralar boshlanmagan, ammo Istanbul jamoasi o‘z niyatida qat’iy.
Shunday qilib, yangi yilda Turkiya futbolida yana bir sensatsiya kuzatilishi mumkin — Karim Benzema Yevropaga qaytib, “Fenerbahche” safida yangi sahifa ochishi ehtimoldan xoli emas.
“Zamin”ni Telegramʻda oʻqing!
