Karreras va Mbappening gollari "Real"ga g‘alaba keltirdi (video)

Ispaniya chempionatining 23-turida “Real” safarda “Valensiya” mehmoni bo‘ldi. O‘yin oldidan madridliklarda qator yo‘qotishlar borligi aytilganiga qaramay, “qirollik klubi” maydonda vaziyatni nazorat qila oldi va muhim uch ochkoni olib qaytdi.

Uchrashuv ancha tarang ruhda kechdi. “Valensiya” uyda o‘ynayotganini his qildirishga urindi, “Real” esa sabr bilan o‘ynab, o‘z imkoniyatini kutishni tanladi. Ikkinchi bo‘limda esa madridliklar kutgan palla keldi.

65-daqiqada hisobni Karreras ochdi. Bu gol “Real”ning o‘yindagi ishonchini yanada oshirdi va raqibni ko‘proq tavakkal qilishga majbur qildi. “Valensiya” oxirgi daqiqalarda kamida bir to‘p urish ilinjida oldinga chiqdi, ammo bunday ochiq o‘yin “Real”ga qarshi xavfli — chunki ularda zarbani hal qiladigan ijrochilar bor.

Hakam qo‘shib bergan daqiqalarda Kilian Mbappe yakuniy nuqtani qo‘yib, “Real”ning 2:0 hisobidagi g‘alabasini rasmiylashtirdi. Shu tariqa, madridliklar baribir o‘z so‘zini aytdi — yo‘qotishlar bo‘lsa ham, natija olishni bildi.

Bu g‘alabadan keyin “Real” ochkolarini 57 taga yetkazib, turnir jadvalida 2-o‘rinda ketmoqda. “Valensiya” esa 23 ochko bilan 17-pog‘onada qoldi va pastki o‘rinlardan uzoqlashish uchun kurashni davom ettiradi.

La Liga. 23-tur

Valensiya – Real 0:2

Gollar: Karreras (65), Mbappe (90+1).

Valensiya tarkibi: Dimitriyevski, Nunes, Gomer, Kopete, Gayya, Rioxa (Ramzani, 81), Pepelu (Rodriges, 72), Ugrinich, Danjuma, Duro, Beltran (Sodiq, 82).

Real tarkibi: Kurtua, Ximenes (Trent, 76), Asensio, Heysen, Karreras, Guler (Mastantuono, 82), Chuameni, Valverde, Kamavinga, Mbappe, Gonsalo Garsiya (Dias, 76).