O‘zbekiston Superligasining 8-turidan o‘rin olgan uchrashuvlardan biri Termiz shahrida bo‘lib o‘tdi. Unda mahalliy “Surxon” jamoasi o‘z maydonida Navoiyning “Qizilqum” klubini qabul qildi. Uchrashuv kutilganidek keskin va murosasiz ruhda kechdi.
Bahs davomida har ikki jamoa ham faol harakat qildi, maydonda kurashlar keskin tus oldi. “Surxon” futbolchilari o‘z muxlislari qarshisida faol o‘yin namoyish etishga intildi, “Qizilqum” esa qarshi hujumlar orqali xavfli vaziyatlar yaratishga harakat qildi. Biroq uzoq vaqt davomida hisob ochilmay qolaverdi.
O‘yinning taqdiri esa so‘nggi daqiqalarga kelib hal etildi. 81-daqiqada mehmonlar safida harakat qilgan Shahzod Rahmatullayev raqib darvozasini ishg‘ol etib, uchrashuvdagi yagona gol muallifiga aylandi. Ushbu gol “Qizilqum”ga juda muhim uch ochkoni taqdim etdi.
Qolgan vaqt mobaynida “Surxon” hisobni tenglashtirish uchun bor imkoniyatlarini ishga soldi. Biroq mehmonlar mustahkam himoyasi va intizomli o‘yini hisobni saqlab qolishga yordam berdi. Natijada, bellashuv 0:1 hisobida “Qizilqum” foydasiga hal bo‘ldi.
Superliga, 8-tur
Surxon – Qizilqum 0:1
Gol: Shahzod Rahmatullayev (81)
Surxon: Otabek Boymurodov, Nodirxon Neʼmatxonov, Behzod Shamsiyev, Doston Tursunov, Stiven Chinedu, Sunnatulla Abdullajonov (Asadbek Karimov, 46), Sarvar Abduhamidov, Tornike Dzebniauri (Farruxjon Qodirov, 59), Behruz Shukurullayev, Muhammadali Musaxonov (Richard Fraydey, 70), Behruz Shaydulov.
Qizilqum: Farhod Rahmatov, Fayzullobek Jumanqo‘ziyev, Shahzod Rahmatullayev, Shahzod Turopov, Nikola Kumburovich, Akmal Muzaffarov (Jambuli Jigauri, 70), Muhammadaziz Ibrohimov, Samandar Shukurullayev, G‘iyosjon Rizaqulov, Shohruz Norxonov (Oleksey Shebetun, 62), Diyor Raxmatilloyev.
Ushbu g‘alaba orqali navoiyliklar turnir jadvalidagi ochkolarini 9 taga yetkazib, o‘z pozitsiyalarini mustahkamladi. “Surxon” esa 8 ochko bilan qolib ketdi va keyingi uchrashuvlarda natijalarni yaxshilashga majbur bo‘ladi.
“Zamin”ni Telegramʻda oʻqing!
