Londonning "Chelsi" klubi rahbariyati Liam Rozenior iste'foga chiqarilganidan so'ng Joze Mourinyoni uchinchi bor bosh murabbiy etib tayinlash g'oyasini rad etdi. Muxlislar tomonidan portugaliyalik mutaxassisni qaytarish bo'yicha kuchli bosim bo'layotganiga qaramay, klub egalari boshqa nomzodlarni ko'rib chiqmoqda. Hozirda "Benfika"da muvaffaqiyatli faoliyat yuritayotgan Mourinyoning "Stemford Brij"ga qaytishi dargumon deb baholanmoqda. Bu haqda Goal.com xabar beradi.
Klub rahbariyati Rozeniorning o'rniga doimiy voris qidirish jarayonida zamonaviy taktik yondashuvga ega yosh murabbiylarga e'tibor qaratmoqda. Nomzodlar orasida "Bornmut" ustozi Andoni Iraola va "Fulxem" murabbiyi Marko Silva borligi aytilmoqda. Klub egalari "Chelsi" tarixidagi eng sovrindor murabbiy bilan xayoliy uchrashuvdan ko'ra, uzoq muddatli yangi loyihani afzal ko'rishmoqda.
Jurnalist Ben Jeykobsning so'zlariga ko'ra, Mourinyoning o'zi yaqin kelajakda klub futbolidan terma jamoa darajasiga o'tishni rejalashtirmoqda. Mutaxassislar uning Jahon chempionatidan so'ng Portugaliya terma jamoasini boshqarishi ehtimoli yuqori ekanini ta'kidlashmoqda. Hozircha londonliklar jamoasini mavsum yakuniga qadar Kalum Makfarlan vaqtinchalik boshqarib turadi.
“Zamin”ni Telegramʻda oʻqing! 
