“Lokomotiv” O‘zbekiston Kubogidagi ishtirokini omadsiz boshladi. Toshkent klubi safarda Pro liga vakili “Lochin”ga qarshi maydonga tushib, 0:1 hisobida mag‘lubiyatga uchradi. Uchrashuvdan keyin “temiryo‘lchilar” bosh murabbiyi Mirko Yelichich o‘yin haqida o‘z fikrlarini bildirdi.
Mutaxassis avvalo raqib jamoaning harakatlariga yuqori baho berdi. Uning ta’kidlashicha, “Lochin” futbolchilari jismonan yaxshi tayyorgarlik ko‘rgan, kurashlarda faol bo‘lgan va maydonda o‘z imkoniyatidan unumli foydalangan.
“Raqibga gap yo‘q. Ular jismonan yaxshi futbol namoyish qilishdi. Shuni hisobga olgan holda kurashlarga tayyor turgandik. Mag‘lub bo‘lish alamli. Demak, ruhan ushbu o‘yinga tayyor bo‘lmaganmiz. Ikkinchi bo‘limda anchagina qo‘shgandik, biroq bu ham yetmadi. Bizning o‘yin sifatimiz esa o‘zimiz istagandek bo‘lmadi”, — dedi Yelichich.
Murabbiyning so‘zlaridan ko‘rinib turibdiki, “Lokomotiv” ikkinchi bo‘limda o‘yinni o‘zgartirishga harakat qilgan. Ammo hujumdagi faollik va bosim golga aylanmadi. Kubok bahslarida esa bitta xato ham butun o‘yin taqdirini hal qilishi mumkin. Bu safar aynan shunday bo‘ldi.
Yelichich “Lochin” himoyasi haqida ham fikr bildirdi. U raqib jamoa tezkor, jismonan kuchli va kurashlarga tayyor bo‘lganini ta’kidladi. “Lokomotiv”da vaziyatlar bo‘lgan, ammo ulardan foydalanishda aniqlik yetishmagan.
“Yaxshi, yomon emas. Ularda tezlik bor, yaxshi kurashishdi. Bizda ko‘plab vaziyatlar bo‘ldi, biroq ular gol o‘tkazishmadi. Bir vaziyatda fol berilishi kerak edi, lekin bu ham bo‘lmadi. Jismonan kuchli futbolchilar yaxshi kurashishdi”, — deya qo‘shimcha qildi mutaxassis.
“Lokomotiv”ning joriy mavsumda o‘tkazib yuborgan gollari ko‘payib borayotgani ham savollarga sabab bo‘lmoqda. Yelichich bu borada jamoaviy o‘yin, raqib harakatlarini oldindan to‘liq o‘qib bo‘lmasligi va standart vaziyatlardagi muammolarga e’tibor qaratdi.
Uning aytishicha, o‘tkazib yuborilgan gollarga qarab xulosa chiqarish oson, ammo o‘yinning ichida ko‘plab detallar bor. Murabbiy jamoada har bir futbolchi o‘z pozitsiyasi va vazifasi uchun javobgar ekanini ta’kidladi.
“Biz jamoaviy o‘yin ko‘rsatyapmiz. Raqibning barcha harakatlarini ham o‘qib bo‘lmaydi. O‘tkazib yuborilgan gollarni ko‘rish oson. Biroq o‘yinning o‘zidan kelib chiqadigan bo‘lsak, ko‘plab qirralarimiz ochilmoqda. Bizda tarkibdagi barcha futbolchilar o‘z nuqtalariga javob berishadi. O‘tkazib yuborgan gollarimizning yarmi standartdan. Bu yaxshi emas. Bu tomonni ham yaxshilashga harakat qilyapmiz. Buning uchun ko‘proq mehnat qilish kerak”, — dedi “Lokomotiv” ustozi.
Shuningdek, Yelichich kubok orqali xalqaro maydonga qaytish imkoniyati haqida ham gapirdi. Uning fikricha, O‘zbekiston Kubogida har bir jamoada imkoniyat bor. Bu musobaqada nomlar emas, aynan tayyorgarlik, xarakter va o‘sha kungi o‘yin sifati hal qiluvchi ahamiyat kasb etadi.
“Bu musobaqada barchaning imkoniyati bor, hattoki “Lochin”da ham. Kubokda istalgan raqib tushib qolishi mumkin. Eng muhimi shu uch o‘yin. Ayrim jamoalar bu bahslardan keyin charchoq alomatlarini his qilishi va xohlagan natijalar qayd etilishi mumkin. Bu esa qilingan mehnatlarni yo‘qqa chiqaradi”, — deya fikr bildirdi murabbiy.
Umuman olganda, “Lokomotiv” uchun bu mag‘lubiyat jiddiy signal bo‘ldi. Kubokda xato kechirilmaydi, ayniqsa, xalqaro maydonga chiqish maqsadi bo‘lsa. Jamoa endi keyingi o‘yinlarda nafaqat natija, balki ruhiy tayyorgarlik, himoyadagi ishonch va standart vaziyatlardagi intizomni ham yaxshilashi kerak. Kubokda yo‘l hali tugamadi, ammo endi har bir bahs “final rejimi”da o‘tadi.
“Zamin”ni Telegramʻda oʻqing!
