Germaniyaning dasturiy taʼminot giganti SAP sunʼiy intellekt texnologiyalarini rivojlantirish maqsadida Prior Labs startapini sotib olishini eʼlon qildi. Kompaniya kelgusi toʻrt yil davomida ushbu loyihaga 1 milliard yevro (taxminan 1,16 milliard dollar) miqdorida sarmoya kiritishni rejalashtirmoqda. Ushbu mablagʻlar korporativ maʼlumotlar bazalari va jadvallar bilan ishlovchi sunʼiy intellekt modellarini yaratishga yoʻnaltiriladi. Bu haqda Techcrunch.com xabar beradi.
Prior Labs atigi 18 oy oldin tashkil etilgan boʻlishiga qaramay, kompaniya tabular foundation models (TFM) yoʻnalishidagi innovatsiyalari bilan eʼtiborni tortdi. Ushbu modellar anʼanaviy til modellariga qaraganda SAP kabi buxgalteriya, kadrlar va xarajatlarni boshqarish tizimlari uchun ancha samaraliroq hisoblanadi. Frank Xutter, Noa Xollmann va Sauraj Gambir tomonidan asos solingan startap SAP uchun strategik ahamiyatga ega xarid boʻldi.
Shu bilan birga, SAP oʻz ekotizimini himoya qilish maqsadida ruxsat etilmagan sunʼiy intellekt agentlariga qarshi qatʼiy siyosat yuritmoqda. Kompaniya oʻz API tizimi orqali faqat "SAP-endorsed" deb belgilangan arxitekturalarga ruxsat beradi. Xususan, NVIDIA kompaniyasining NemoClaw vositasi SAP tomonidan maʼqullangan boʻlib, mijozlar ushbu texnologiyadan foydalanishlari mumkin.
SAP rahbariyati sunʼiy intellektni ham tahdid, ham katta imkoniyat sifatida baholamoqda. Kompaniya avvalroq Anthropic, Aleph Alpha va Cohere kabi yirik AI kompaniyalariga ham sarmoya kiritgan edi. SAP texnik direktori Filipp Xertsigning soʻzlariga koʻra, kompaniyaning asosiy maqsadi dunyo biznesini boshqarib turuvchi strukturaviy maʼlumotlar uchun eng samarali AI yechimlarini ishlab chiqishdir.
“Zamin”ni Telegramʻda oʻqing!
