Rossiyaning "Vimpelkom" operatori o‘z abonentlari uchun xalqaro roumingda 5G tarmog‘ini ishga tushirganini e’lon qildi. Kompaniya ma’lumotlariga ko‘ra, yangi avlod aloqa texnologiyasi hozirda dunyoning 30 dan ortiq davlatida, jumladan, O‘zbekiston, Qozog‘iston, Turkiya, Xitoy, BAA va AQSh kabi mashhur turistik yo‘nalishlarda mavjud. Bu haqda Ixbt.com xabar beradi.
Ushbu qamrov rouming xizmatidan foydalanadigan mijozlarning qariyb 80 foizini qamrab oladi. Dunyo bo‘ylab 5G tarmoqlari 2019-yildan buyon faoliyat yuritib kelayotgan bo‘lsa-da, Rossiyaning o‘zida ushbu texnologiyani ommaviy joriy etish jarayoni hali tayyorgarlik bosqichida.
Rossiya Raqamli rivojlanish vazirligi mamlakatda 5G tarmoqlarining to‘liq tijoriy ishga tushirilishini 2026-yilga mo‘ljallamoqda. Ayni paytda operatorlar infratuzilmani rivojlantirish evaziga chastotalarni auksionsiz olish imkoniyatini muhokama qilmoqda. Rejaga ko‘ra, 2031-yilga borib Rossiyaning barcha millionli shaharlarini 5G bilan qamrab olish ko‘zda tutilgan.
“Zamin”ni Telegramʻda oʻqing!
