Ish jarayonlarini boshqarish boʻyicha yetakchi platformalardan biri boʻlgan Asana oʻzini sunʼiy intellektga asoslangan ishchi muhit sifatida namoyon etish maqsadida Stack AI kompaniyasini 75 million dollarga sotib olganini eʼlon qildi. Ushbu kelishuv doirasida Stack AI asoschilari Tony Rosinol va Bernard Aceituno ham Asana jamoasiga kelib qoʻshiladi. Bu haqda Techcrunch.com xabar beradi.
Asana ushbu xaridni oʻzining strategik burilishi deb atamoqda va platformani "odamlar va agentlar jamoasi uchun operatsion tizim"ga aylantirishni koʻzlamoqda. Stack AI tizimi Salesforce, Slack va Gsuite kabi mavjud biznes platformalaridan maʼlumotlarni olib, murakkab ish jarayonlarini avtomatlashtiruvchi agentlarni yaratishga ixtisoslashgan.
Y Combinator bitiruvchisi boʻlgan Stack AI shu kunga qadar 20 million dollarga yaqin investitsiya jalb qilgan edi. Kompaniya bozorda Zapier kabi avtomatlashtirish vositalari hamda OpenAI va Anthropic kabi yirik laboratoriyalar bilan raqobatlashib kelayotgan edi. Endilikda ushbu texnologiyalar Asana ekotizimiga toʻliq integratsiya qilinadi.
Soʻnggi yillarda Asana bir qator AI mahsulotlarini, jumladan, AI Studio va AI Teammates seriyasini taqdim etdi. Kompaniya ChatGPT paydo boʻlganidan beri bozor qiymatining yarmidan koʻpini yoʻqotgan boʻlsa-da, yangi rahbariyat inson va agent hamkorligiga asoslangan mahsulotlar orqali oʻsishga erishishiga ishonmoqda.
Asana bosh direktori Dan Rogersning taʼkidlashicha, ushbu xarid kompaniya yoʻl xaritasini tezlashtiradi. "Stack AI bizga eng murakkab biznes jarayonlarini boshidan oxirigacha agentlashtirish imkonini beradi", — deya qoʻshimcha qildi u.
“Zamin”ni Telegramʻda oʻqing!
