Organizm uchun eng muhim element — magniyga boy mahsulotlar

^{Foto: Shutterstock}
Magniy mikroelementi sog‘liq uchun shunchalik muhimki, u organizmdagi deyarli barcha jarayonlarga — asab impulslarining uzatilishi, qonning suyuqlik darajasi, yurak va qon-tomir tizimi, foydali moddalarning organizm tomonidan singdirilishi va yaxshi kayfiyatga javob beradi.

Tibbiyotda magniyga stress, charchoq, tushkunlik va depressiya bilan kurashadigan eng samarali element sifatida qaraladi. Normada inson tanasida 25 gramm magniy moddasi mavjud. Ushbu yengil metall 360 ga yaqin moddalar almashinuvida ishtirok etadigan hayot uchun eng zarur mikroelement sanaladi. Uning foydali tomonlari:

Suyaklarni mustahkamlaydi

Agar organizmda magniy yetishmasa, suyak to‘qimalarining asosi sanalgan kalsiy organizmda so‘rilmaydi va natijada osteoporoz — bo‘g‘imlarda kalsiy yig‘ilib qolishi kasalligi rivojlanadi.

Diabetga chalinishdan saqlaydi

Magniy qondagi glyukoza miqdorining me’yorda bo‘lishiga javob beradi va metabolizm jarayoni tezroq ishlashiga ko‘mak beradi.

Yurak va qon-tomirlar uchun muhim

Shifokorlar tavsiyasiga ko‘ra, magniy preparatlarini qabul qilish va uning qondagi miqdorini tartibga solish insultga chalinish xavfini bir necha martaga kamaytiradi, chunki magniy yurakning normal faoliyati uchun muhim modda sanaladi.

Teri salomatligi va go‘zalligi manbai

Inson ulg‘aygani sari organizmda kollagen sintezi sekinlashib boradi, magniy yetishmaganda esa bu jarayon bir necha marta tezroq amalga oshadi. Teriga barvaqt ajin tushishi va uning elastikligi yo‘qolishi ham magniy bilan bog‘liq.

Shuningdek, ushbu modda uyqusizlik, bosh og‘rig‘i, asabiylikni bartaraf etadi, klimaks davri yengilroq kechishiga yordam beradi va immunitetni oshiradi.

Magniyga boy oziq-ovqatlar

^{Foto: Shutterstock}
Kattalar iste’mol qilishi tavsiya etilgan bir sutkalik magniy miqdori — 500 mg. Buning uchun magniyga boy quyidagi mahsulotlarni taomnomaga kiritish tavsiya etiladi. 100 gramm mahsulotdagi magniy miqdori milligrammda (mg):

• Bug‘doy kepagi – 560;
  
• Kakao kukuni – 440;
  
• Grek va kedr yong‘og‘i, keshyu, qovoq, kungaboqar va kanakunjut urug‘lari – 270 gacha;
  
• Dukkaklilar, grechka – 250 gacha;
  
• Yangi undirilgan bug‘doy donlari — 250;
  
• Qora shokolad – 200;
  
• Suli yormasi, arpa donlari va tozalanmagan guruch – 100;
  
• Sut mahsulotlari – 100 gacha;
  
• Magniy tuzlari qo‘shilgan mineral suv – 950 gacha.
  

Bundan tashqari, magniy moddasi yangi uzilgan yashil va olovrang meva va sabzavotlar tarkibida ko‘p uchraydi. Magniy organizmda yaxshi so‘rilishi uchun kalsiy ham qabul qilish lozim. Qo‘shimcha preparatlarni shifokor tavsiyasiga ko‘ra ichish kerak, vitamin va minerallarning me’yordan oshib ketishi mumkin emas. “Zamin” yangiliklarini “Twitter”da kuzatib boring