Gastroenterolog Natalya Motileva ichak salomatligi uchun eng xavfli bo'lgan oziq ovqat mahsulotlari haqida ogohlantirdi. Mutaxassisning ta'kidlashicha, ultra qayta ishlangan mahsulotlar inson organizmi, xususan, oshqozon ichak tizimi uchun jiddiy xavf tug'diradi.
Shifokor ayniqsa kolbasa, hot dog va jambon kabi go'sht mahsulotlarini haftasiga 500 grammdan ortiq iste'mol qilishni tavsiya etmaydi. Bunday mahsulotlarni muntazam yeyish yo'g'on yoki to'g'ri ichak shilliq qavatida xavfli o'smalar, ya'ni kolorektal saraton rivojlanish ehtimolini sezilarli darajada oshiradi.
Shuningdek, fastfud, chips va shakarli gazlangan ichimliklar ham ichak mikroflorasiga salbiy ta'sir ko'rsatadi. Bunday mahsulotlar ichakdagi foydali bakteriyalar xilma xilligini kamaytirib, ovqat hazm qilish jarayonini qiyinlashtiradi va immunitetni tushiradi. Natijada odamda turli yallig'lanish kasalliklari kelib chiqishi mumkin.
Motilevaning so'zlariga ko'ra, sanoat usulida tayyorlangan mahsulotlar tarkibidagi emulgatorlar diareyani keltirib chiqarsa, ortiqcha tuz va shakar moddalari tanada shish paydo bo'lishiga sabab bo'ladi. Bundan tashqari, tarkibida ko'p miqdorda fruktoza bo'lgan mahsulotlar ichak harakatini buzib, qorin dam bo'lishi va og'riqlarni yuzaga keltiradi. Shifokor sog'lom bo'lish uchun tabiiy va kam qayta ishlangan mahsulotlarga ustunlik berishni maslahat beradi.
“Zamin”ni Telegramʻda oʻqing!
