Mamlakatimiz tibbiyot tizimini zamonaviy boshqaruv tamoyillari asosida qayta qurish va ko‘rsatilayotgan xizmatlar sifatini yangi bosqichga olib chiqish maqsadida Prezidentning muhim Farmoni qabul qilindi. 2026 yil 5 maydagi ushbu hujjat sohada shaffoflikni ta’minlash va aholi salomatligini muhofaza qilishda yangi mexanizmlarni joriy etishni nazarda tutadi.
Yangi tuzilmalar — sifatli tibbiyot garovi
Farmonga muvofiq, Sog‘liqni saqlash vazirligi tarkibida bir qator ixtisoslashgan muassasalar ish boshlaydi. Jumladan, ilgarigi Salomatlik va strategik rivojlanish instituti negizida Aholi salomatligini tahlil qilish ilmiy-tadqiqot markazi tashkil etildi. Ushbu markaz tibbiyotdagi ko‘rsatkichlarni chuqur o‘rganib, strategik yechimlar ishlab chiqadi.
Shu bilan birga, tibbiy xizmatlarning standartlarga mosligini tekshiruvchi Klinik audit inspeksiyasi va uning hududiy filiallari, shuningdek, sohadagi axborot siyosatini yurituvchi Kontent mediamarkazi faoliyati yo‘lga qo‘yiladi.
Xalq bilan muloqot: Muammolar e’tiborsiz qolmaydi
Tizimdagi eng katta yangiliklardan biri — aholi murojaatlari bilan ishlashning soddalashtirilganidir. Endilikda autsorsing asosida zamonaviy «Call-markaz» tashkil etiladi. Bu markaz fuqarolarning shikoyat va takliflarini tezkorlik bilan qabul qilib, ularni kechiktirmasdan tegishli mas’ullarga yo‘naltiradi.
Bundan tashqari, shifokorlar va bemorlar o‘rtasidagi uzviy aloqani ta’minlash uchun maxsus «Feedback» (qayta aloqa) platformasi ishga tushiriladi. Ushbu raqamli tizim orqali tibbiy xizmatlarning real holati, dori-darmon ta’minoti va shifoxonalardagi muammolar ochiq-oydin tahlil qilib boriladi.
Tibbiyot assotsiatsiyalariga keng imkoniyatlar
2026 yil 1 sentyabrdan boshlab sohadagi jamoatchilik nazorati va professional birlashmalarning roli sezilarli darajada oshadi. Tibbiyot assotsiatsiyalariga quyidagi vakolatlar berilmoqda:
Davolash standartlarini ishlab chiqish va ularni muhokama qilishda ishtirok etish;
Shifoxonalardagi xizmat ko‘rsatish sifatini Davlat tibbiy sug‘urtasi jamg‘armasi bilan birgalikda baholash;
Tibbiyot xodimlarini qayta tayyorlash, ularning malakasini imtihondan o‘tkazish va sertifikatlash jarayonlarini boshqarish.
Ushbu o‘zgarishlar nafaqat tibbiyot xodimlarining mas’uliyatini oshiradi, balki har bir fuqaroning sifatli va malakali tibbiy yordam olishi uchun mustahkam huquqiy zamin yaratadi.
Sizningcha, «Feedback» platformasi shifoxonalardagi korrupsiya va sifatsiz xizmatga chek qo‘ya oladimi?
“Zamin”ni Telegramʻda oʻqing!
