date

БАА университети Ўзбекистонда ўз филиалини очиши мумкин

БАА университети Ўзбекистонда ўз филиалини очиши мумкин

Ўзбекистон дипломатлари Бирлашган Араб Амирликларидаги Al-Ain University раҳбарияти билан муҳим музокаралар ўтказишди. Учрашувда олий таълим соҳасидаги имкониятлар, инвестиция муҳити ва икки томонлама ҳамкорлик масалалари асосий йўналиш бўлди.

Суҳбат аввалида Ўзбекистонда олий таълим тизимида амалга оширилаётган ислоҳотлар ҳамда қулай инвестиция муҳитини шакллантириш йўналишидаги чоралар ҳақида тақдимот ўтказилди. Бу мамлакатимизда илм-фан ва таълим соҳасининг янги босқичга кўтарилаётганидан далолат берди.

Музокара давомида талабалар ва профессор-ўқитувчилар алмашинуви дастурини йўлга қўйиш, университет раҳбариятининг Ўзбекистонга сафарини ташкил этиш ва келгусида юртимизда Al-Ain University филиалини очиш масалалари муҳокама этилди.

Университет раисининг ўринбосари Нур Алдин Ататрех ушбу таклифларни қўллаб-қувватлар экан, шу билан бирга Ўзбекистонда уй-жой қурилиши ва соғлиқни сақлаш йўналишларида ҳам қатор инвестиция лойиҳаларини амалга оширишга қизиқиш билдирди.

Маълумот учун, Al-Ain University 2004 йилда таъсис этилган бўлиб, у икки асосий кампусга эга: бири Ал-Айн шаҳрида, иккинчиси Абу-Дабида жойлашган. Университет муҳандислик, тиббиёт, фармацевтика, ҳуқуқ, таълим ва ижтимоий фанлар, бизнес ва оммавий коммуникациялар каби кўплаб соҳаларда юқори малакали мутахассислар тайёрлаб келмоқда.

Муттахассислар фикрича, ушбу ҳамкорлик Ўзбекистон таълим соҳасига янги суръат бағишлаши ва келажакда икки мамлакат ўртасидаги илмий алоқаларни янада мустаҳкамлаши мумкин.


Фото: Дунё

Ctrl
Enter
Хато топдИнгизми
Иборани ажратиб Ctrl+Enter тугмасини босинг
Янгиликлар » Ўзбекистон » БАА университети Ўзбекистонда ўз филиалини очиши мумкин