Ўзбекистон ва Туркия ўртасидаги кўп асрлик дўстлик ва қардошлик ришталари бугун янги, стратегик босқичга кўтарилмоқда. Икки давлат нафақат иқтисодий ва маданий, балки мудофаа ҳамда хавфсизлик соҳасида ҳам кучларни бирлаштирмоқда.
Туркия миллий мудофаа вазири Яшар Гюлернинг маълум қилишича, Анқара Ўзбекистон Қуролли Кучларини тизимли ислоҳ қилиш ва замонавийлаштиришга кўмаклашиш мақсадида Тошкентга махсус ҳарбий маслаҳатчилар гуруҳини юборган. Бу ҳақда Туркиянинг нуфузли Sabah нашри хабар тарқатди.
Турк модели: Нега айнан ушбу тизим танланди?
Яшар Гюлернинг таъкидлашича, дунёдаги бир қатор «дўстона ва биродар мамлакатлар» бугунги кунда Туркия армиясининг юксак тажрибаси ҳамда самарали тузилмасига катта қизиқиш билдирмоқда.
«Ўзбекистон мана шундай яқин ва қардош давлатлардан биридир. Биз худди Озарбойжонда бўлгани каби, Ўзбекистонга ҳам ўз ҳарбий маслаҳатчиларимиздан иборат тажрибали гуруҳни сафарбар этдик», — дейди Туркия мудофаа вазири.
Эслатиб ўтамиз, жорий йилнинг январь ойида Ўзбекистон ва Туркия мудофаа вазирликлари ўртасида муҳим ҳамкорлик режаси имзоланган эди. Ушбу ҳужжатдан қўшма ҳарбий машғулотларни ташкил этиш, профессионал кадрлар тайёрлаш ҳамда ҳарбий-тиббиёт соҳасини ривожлантириш каби стратегик вазифалар ўрин олган.
Озарбойжонда синалган ва зафар қучган тажриба
Мутахассисларнинг қайд этишича, Туркия томонидан Ўзбекистон мудофаа тизимига татбиқ этилаётган ушбу модел ўз вақтида Озарбойжонда юксак натижа берган. 2021 йилда имзоланган тарихий «Шуша декларацияси»дан сўнг, Боку ва Анқара ўртасидаги ҳарбий шериклик янги босқичга чиқди.
Ушбу муваффақиятли лойиҳа доирасида Озарбойжон армияси тўлиқ Туркия стандартлари асосида янгиланди, ўзаро қўшма машқлар сони каррасига ошди. Энг муҳими, мудофаа саноатида инновацион технологиялар, хусусан, дунёга машҳур Bayraktar учувчисиз учиш аппаратларидан фойдаланиш бўйича мустаҳкам тизим яратилди.
Эндиликда мана шундай замонавий ва синовдан ўтган ҳарбий тажриба Ўзбекистон Қуролли Кучлари қудратини янада оширишга хизмат қилади. Бу эса нафақат юртимиз, балки бутун Марказий Осиё минтақасида барқарорлик ва хавфсизликни таъминлашда муҳим пойдевор бўлиши шубҳасиз.
“Zamin”ни Telegram'да ўқинг!
