Байденнинг Конгрессга мурожаати: Америка Путин синовига бардош берди, Украинани қўллаш давом этади

^{Фото: Reuters}
АҚШ президенти Жо Байден Конгресснинг икки палатаси қаршисида «Мамлакатдаги ҳолат тўғрисида» ҳар йилги мурожаат билан чиқиш қилиб, ўз ютуқлари қаторида Украинани Россиянинг тажовузига қарши туришда қўллаб-қувватловчи халқаро коалиция тузганини ҳам санаб ўтди.

Украинадаги уруш мавзуси Байденнинг бир ярим соатга яқин давом этган нутқида катта жой эгалламади, у бу мавзуга чиқиши охирида тўхталди.

У асосий эътиборни ўз маъмурияти ютуқларига, жумладан иқтисодий ҳолат, сўнгги 50 йилликдаги энг паст ишсизлик даражаси, шунингдек Америка жамиятининг полициядаги ирқчилик ва ўқотар қуролларнинг руҳий ҳолати беқарор бўлган одамлар қўлига тушиши каби ўзига хос муаммоларига қаратди.

Бу президент Байденнинг учинчи мурожаатномаси бўлди - ноябр ойидаги оралиқ сайловлардан кейинги биринчиси, ўшанда Вакиллар палатасида республикачилар кўпроқ ўринни эгаллашганди.

Шу билан биргаликда, республикачиларнинг сон жиҳатдан устунлиги сайловлардан олдин кутилганидан камроқ бўлди, қолаверса улар Сенатда устунликни қўлга кирита олмади. Ноябр ойида 80 ёшни қаршилаган президентнинг нутқи эса ишончли ва жанговар кўринди.

Байден ўзининг олдинги мурожаати Россиянинг Украинага кенг кўламли босқинининг дастлабки кунларида бўлганини эслади - «Иккинчи жаҳон уруши даврида Европа бошдан кечирган ўлим ва вайронгарчилик картинаси хотираларини уйғотадиган қонли ҳужум».

«Путиннинг босқини асрга татигулик синов бўлди. Америка учун синов. Бутун дунё учун синов. Биз энг асосий тамойилларга амал қиламизми? Биз суверенитетни ҳимоя қила оламизми? Биз халқнинг зулмдан эркин бўлиш ҳуқуқини ҳимоя қиламизми? Биз демократияни ҳимоя қилиш учун туриб бера оламизми? Зеро бундай ҳимоя биз учун муҳим, у тинчлик ва осойишталикни сақлайди, хавфсизлигимиз ва фаровонлигимизга таҳдид солувчи барча эҳтимолий тажовузкорлар учун ов мавсумини тўхтатади», дея давом этган америкаликлар президенти.

«Бир йил ўтиб биз бу саволларнинг жавобини биляпмиз. Ҳа, ҳимоя қиламиз. Биз аллақачон ҳимоя қиляпмиз. Биз биргаликда Америка энг яхши даврларида қилган ишни қилдик. Биз етакчиликни қўлга олдик. Биз НАТОни бирлаштирдик. Биз глобал коалиция туздик. Биз Путиннинг тажовузига қарши турдик. Ва биз Украина халқи билан елкама-елка турдик», - деган Байден.

^{Байден Украина элчисига мурожаат қилди.}
У залда ўтирган Украинанинг АҚШдаги элчиси Оксана Маркаровага юзланган ва йиғилганлардан уни олқишлашни сўраган.

«У нафақат ўз халқини, балки ўз халқи жасоратини ифодалайди. Эй элчи, Америка сизнинг мамлакатингизни қўллаб-қувватлашда ҳамжиҳат. Биз қанча керак бўлса шунча вақт сиз билан бирга бўламиз», деди Байден.

Янгиликлар