Америкалик тадбиркор Вивек Рамасвами агар у АҚШ президенти этиб сайланса, уч кун ичида Россия раҳбари Владимир Путин билан Украина конфликтини ҳал қилиш бўйича музокара олиб боришга ҳаракат қилишини айтди. Бу ҳақда у Politico’га берган интервьюсида маълум қилди.
Рамасвамининг сўзларига кўра, агар Киев бу келишувга рози бўлмаса, Америка ёрдамисиз урушни давом эттиради. У президентлик муддатининг бошида Путин билан учрашиш ва унга Украина бўйича келишувларга эришиш учун 72 соат вақт беришини айтди.
Музокаралар чоғида АҚШ Украинага иқтисодий ва ҳарбий ёрдамни музлатиб қўяди, шунда Рамасвами режасига кўра, “Москва Вашингтон ниятларига ишониши мумкин”.
“Агар томонлар келишувга эришса-ю, лекин Киев жангни давом эттиришга қарор қилса, Вашингтон унга ёрдам беришни тўхтатади”, — дейилади хабарда.
Агар Россия келишув шартларини бажаришдан бош тортса, Украина зудлик билан НАТОга қабул қилинади ва Россия янги санкциялар шаклида “максимал босим” остида қолиши мумкин.
Европаликларни ўз режасига қандай ишонтириши ҳақида гапирар экан, Рамасвами “НАТО доирасидаги кучли мажбуриятлар”га ишора қилди, уларга риоя қилинмаса, АҚШнинг альянсни қўллаб-қувватлашини йўқотиш хавфи бор.
АҚШ президентлигига номзодини эълон қилган тадбиркор аввал ҳам бу ҳақда гапирган. У Вашингтон Киевни конфликтга барҳам бериш учун Россия фойдасига “катта ён босишга” ишонтириши кераклиги ва НАТОнинг кенгайиши “махсус операция” учун ягона сабаб бўлганини таъкидлаган.
