Германияда кекса аёлнинг ўлимида айбланиб, 13 йил қамоқда ўтирган эркак қотиллик қурбони бахтсиз ҳодиса оқибатида вафот этгани аниқлангандан кейин оқланди.
63 ёшли Манфред Гендицки қотилликда айбдор деб топилиб, 2010 йилда Мюнхен суди томонидан умрбод қамоқ жазосига ҳукм қилинган эди. Ўшанда судьялар айбланувчи 2008 йилда Бавариянинг Роттах-Эгерн шаҳридаги квартирада жанжаллашиб 87 ёшли аёлни бошига урган, сўнг ваннага чўктирган, деб хулоса қилган.
Аёл яшаган мажмуада қоровул бўлиб ишлаган Гендицкий ҳар доим ўзининг айбсизлигини айтиб келган, унинг дастлабки ҳукм устидан шикояти муваффақиятсизликка учраган: Федерал суд ишни қайта кўриб чиқишни буюрган, натижада у 2012 йилда яна судланган.
7 июль куни Мюнхен штат судида ҳукмни ўқиб эшиттирар экан, судья Элизабет Эрл Гендицкийга шундай деди: “Сиз деярли 14 йилдан бери кутган сўзларни эшитдингиз”.
Судья Гендицкий қамоқхонада бегуноҳ ўтказган вақти учун компенсация олиши кераклигини айтди.
Мутахассисларнинг қайта ўрганишидан кейин маълум бўлишича, аёл кир ёки оёғини ювиш учун эгилганда ваннага йиқилиб тушган, у ҳушидан кетиб, сувдан чиқолмаган.
Германияда ноҳақ қамоққа олинган шахслар ҳибсдаги ҳар бир куни учун 75 евро миқдорида товон пули олиш ҳуқуқига эга. Гендицкий 368 400 евро олиши керак. Бундан ташқари, эркак даромадидан айрилгани учун компенсация талаб қилиш ҳуқуқига эга.
“Замин” янгиликларини “Инстаграм”да кузатиб боринг
