Тюмен ва Свердловск областлари билан ўзбекистонликларни ишга жойлаштириш бўйича келишиб олинди

^{Фото: Дунё}
Ўзбекистон Бош консулхонаси ходимлари Россиянинг Тюмен областидаги "Сити Строй72" масъулияти чекланган жамияти раҳбари Жанат Габдулинов ва Свердловск областидаги "СЭВКО" заводи директори Владислав Коротенко билан музокара ўтказди.

Учрашувлар Ўзбекистон президентининг "Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида"ги қарорида белгиланган вазифалар ижроси доирасида ташкил этилди.

Мулоқотлар давомида Ўзбекистонда меҳнат миграциясини тартибга солиш бўйича амалга оширилаётган дастурлар, хорижга ишчи кучини жалб қилиш мақсадида мамлакат ҳар бир вилоятида ташкил этилган Мономарказлар фаолияти ҳақида сўзлаб берилди.

Томонлар ушбу корхоналарда мавжуд бўш иш ўринларига Ўзбекистон фуқароларини уюшган ҳолда жалб қилиш истиқболлари хусусида фикр алмашилди.

Бўлиб ўтган музокаралар натижасида "Сити Строй72" МЧЖ 100 нафарга яқин, "СЭВКО" заводи эса 80 кишини иш билан таъминлаш бўйича Ўзбекистон томонига буюртма жўнатиши тўғрисида келишиб олинди. “Замин” янгиликларини “Telegram”да кузатиб боринг