Украина дронлари ва ракеталари Россиянинг уч ҳудудига ҳужум қилди

^{Фото: Видеодан кадр}
Тула области 14 январ, сешанбага ўтар кечаси Украина дронлари ҳужумига учради, деб хабар берди минтақа губернатори Дмитрий Миляев Telegramʼда. Аввалроқ, 13 январ куни кечқурун губернатор Александр Богомаз Брянск области ҳудудига «қўшма ракета зарбаси» уюштиришга уриниш ҳақида хабар берган эди. Айни пайтда Саратов области губернатори Роман Бусаргин Telegramʼда УУА ҳужуми натижасида Энгелсдаги «саноат корхонаси» зарар кўрганини ёзди.

Брянск кимё заводига ҳужум ҳақида хабарлар

Богомаз қайси объектга зарба берилганига аниқлик киритмаган. Бироқ, баъзи Telegram каналлари, хусусан, ASTRA ўз ўқувчиларига таяниб, нишон Селцо шаҳрида жойлашган СССРнинг 50 йиллиги номидаги Брянск кимё заводи бўлганини ёзмоқда. Бошқа версия: Брянск яқинидаги ўқ-дорилар омборига ҳужум қилинган. Маълум қилинишича, ҳужумда Американинг ATACMS ракеталаридан фойдаланилган.

ASTRA таъкидлаганидек, СССРнинг 50 йиллиги номидаги Брянск кимё заводи 2024 йил апрел ойида ҳам Украина УУА нишонига айланган. «Завод портловчи моддалар ишлаб чиқаради ва давлат мудофаа буюртмаларини бажариш билан шуғулланувчи «Техмаш» ҳолдинг компанияси таркибига киради», — деб эслатади муаллифлар.

Тула областидаги Алексинга дрон ҳужуми

Тула области губернатори Дмитрий Миляев соат 02:25 лар атрофида Алексин шаҳрига ҳужум уюштирилгани ҳақида хабар берди. «Дрон қолдиқларининг қулаши натижасида бир нечта автомобил ва хўжалик бинолари ҳамда турар жой биносининг деразаларига зарар етганлиги аниқланди. Жабрланганлар йўқ», — дейилади унинг постида. Дастлабки маълумотларга кўра, Тула области узра ҳаво ҳужумидан мудофаа тизимлари томонидан 16 та УУА йўқ қилинган, дея қўшимча қилди губернатор.

У Украина учувчисиз учоқларининг нишони қайси объектлар бўлганига аниқлик киритмади. Айни пайтда, бир қатор Telegram каналлари ўз обуначилари томонидан портлаш лаҳзаси суратга олингани айтилган видеоларни эълон қилди.

Журналист Александр Невзоров манба келтирмаган ҳолда «Тулада ҳарбий заводларга ҳам ҳужум қилинмоқда», деб ёзди. Ўз навбатида, Shot Telegram-каналида портлашлар соат 23:45 да бошлангани ва 8 дан 12 гача «баланд товушлар» эшитилгани ҳақида хабар берди.

2024 йил 9 ноябрда Алексин кимё заводига ҳужум уюштирилди. "Ростех" корпорацияси таркибига кирувчи ушбу корхонанинг веб-сайтида у бўёқ ва лаклар, каучук маҳсулотлар, маиший кимё ва спирт маҳсулотлари ишлаб чиқарувчи энг йирик компаниялардан бири эканлиги таъкидланган. Шу билан бирга, Reuters нашрининг ёзишича, у порох ва ўқ-дориларни ҳам чиқаради.

Саратовнинг Энгелсидаги саноат корхонасига ҳужум

Саратов области губернатори Роман Бусаргин ҳужум тафсилотларини маълум қилмаган ва зарар кўрган «саноат корхонаси» номини ҳам айтмаган. У фақат «фавқулодда вазиятлар ва тезкор хизматлар кучайтирилган режимда ишлаётганини» таъкидлади.

8 январ куни Энгелс-2 ҳарбий аэродроми учун ёнилғи сақланадиган Росрезервнинг «Кристалл» нефт базасига ҳужум қилинди. “Замин” янгиликларини “Telegram”да кузатиб боринг