Трамп Россия ва Украина билан учрашувларни анонс қилди

Кремлдагилар Суджадаги интернатга қилинган ҳужумни «Киев режимининг ваҳшиёна провокацияси» деб ҳисоблайди, дея маълум қилди РФ президенти матбуот котиби Дмитрий Песков.

Песков журналистнинг зарба натижасида ҳалок бўлганлар сони ҳақидаги аниқлаштирувчи саволига жавоб бермасдан, бу борадаги барча маълумотни мудофаа вазирлиги тақдим этишини айтган. «Сиз РФ мудофаа вазирлиги баёноти билан танишиш имкониятига эгасиз. Бунга қўшимча қиладиган гапимиз йўқ», — деган Песков.

Ўтган йилнинг август ойидан буён украин қўшини томонидан ишғол этилган Суджадаги собиқ интернат мактаб биносига 1 феврал куни ракета зарбаси берилган. Украина қуролли кучлари бош штаби унга россиялик ҳарбийлар зарба йўллагани ва Россия томони бинода «фақат тинч аҳоли вакиллари жойлашгани»дан хабардор бўлганини билдирган. Украина қуролли кучларига кўра, тўрт киши ҳалок бўлган.

Зарбадан бир неча соат ўтиб Россия мудофаа вазирлиги бино Украина қуролли кучлари ҳужумига учраганини айтиб чиқди — Россия ҳарбий идорасидагилар ҳаво ҳужумидан мудофаа кучлари украин ракеталари Суми областидан учирилганини қайд этган.

Ҳозирча икки томон ҳам ўз версиялари фойдасига объектив далиллар тақдим этмади.

Доналд Трамп Россия, Украина ва «турли томонлар» билан учрашувларни анонс қилди

АҚШ президенти Доналд Трамп ўз маъмурияти аллақачон Москва билан ҳам, Киев билан ҳам ҳарбий ҳаракатларни тўхтатиш ва тинчлик келишуви тузишга қаратилган «учрашув ва музокаралар» ўтказишни режалаштираётганини маълум қилди.

«Биз Украина билан ҳам, Россия билан ҳам ишлаяпмиз, турли томонлар, жумладан, Украина ва Россия билан учрашувлар ҳамда музокаралар режалаштирилган. Ўйлайманки, муҳокамалар яхши кетмоқда», — деган Трамп.

АҚШ президенти ҳеч қандай тафсилотларни келтирмаган — бу учрашувлар қачон ва қандай таркибда бўлиши режалаштирилганига тўхталмаган.

Трампнинг бу сўзлари янграшидан бир неча соат олдинроқ унинг Украина бўйича махсус вакили Кит Келлог агар ҳарбий ҳаракатлар тўхташини истаса, икки томон ҳам ён бериши лозимлиги ҳақидаги АҚШнинг олдинроқ билдирилган позициясини такрорлаганди. Келлог Украина президенти Володимир Зеленский «ҳудудлар бўйича позициясини юмшатгани»ни билдирган. «Ва Путин ҳам ўз позицияларини юмшатишига тўғри келади», — дея қайд этган у.

Келлог «катта эҳтимол билан, яқин вақтлар ичида» АҚШ вакиллари «барча билан» муҳокамалар ўтказишини таъкидлаган.

Зеленский 2 феврал куни Associated Press учун берган интервюсида Келлог «жуда тез фурсатларда» Киевда бўлишини айтган ва ҳозирча ташрифнинг аниқ саналари белгиланмаганини қўшимча қилганди. «Бу яқин ҳафталарда, яқин саналарда бўлиши биз учун жуда муҳим. Ўйлайманки, буларнинг бари бўлади», — деганди у.

РФ президенти матбуот котиби Дмитрий Песков 3 феврал куни ҳозирча Москва билан «ҳеч ким музокаралар иштирокчиларининг эҳтимолий комбинациясини муҳокама қилмагани»ни айтди. У Путиннинг Зеленскийнинг 2022 йилдаги РФ билан музокараларни тақиқлаган фармони туфайли ҳозирда «украинлар президенти бундай музокаралар ўтказишга ҳақли эмаслиги» ҳақидаги сўзларини такрорлади. Путин аввалроқ Москвадагилар фикрича бу фармонни фақат Олий рада бекор қилиши мумкинлиги — чунки Зеленский легитим президент эмаслигини айтганди. Зеленскийнинг ўзи бундай фармон мавжудлиги мамлакат президенти сифатида музокаралар олиб боришига тўсқинлик қилмаслигини билдирган. “Замин” янгиликларини “Telegram”да кузатиб боринг