Туркияда аёлни рухсатсиз суратга олган ўзбекистонлик депортация қилинади

Туркияда ўзбекистонлик фуқаро аёлни унинг розилигисиз суратга олгани учун жиддий оқибатларга дуч келди. Ҳодиса мамлакат қонунчилиги доирасида қаралиб, унга нисбатан депортация чораси қўлланиши белгиланди. Бу ҳақда Ўзбекистоннинг Туркиядаги Бош консулхонаси маълум қилди.

Маълумотларга кўра, вазиятга ўз вақтида аралашган консуллик ходимлари фуқаронинг жазосини енгиллаштиришга ёрдам беришган ва жиноий иш қўзғатилишининг олди олинган. Аммо у барибир Туркиядан чиқариб юборилади.

Рухсатсиз суратга олиш – жиноий ҳаракат

Бош консулхона томонидан берилган расмий огоҳлантиришда таъкидланишича:

“Туркияда бегона шахсларни уларнинг рухсатисиз суратга ва видеога олиш – шахсий дахлсизликни бузиш сифатида баҳоланади ва бу сизга нисбатан жиддий ҳуқуқий чоралар кўрилишига сабаб бўлиши мумкин”.

Айни пайтда Туркиядаги ички ишлар органлари шахсий ҳаёт дахлсизлигига доир қонунларни қатъий риоя қилмоқда. Жумладан, шахснинг розилигисиз унинг расмини олиш, тарқатиш ёки интернетга жойлаштириш жиноий ҳаракат сифатида баҳоланиши мумкин.

Консуллик: Фуқаролар қонунларга эҳтиром билан ёндашиши керак

Бош консулхона ушбу воқеа орқали Туркияда яшаб, ишлаб ёки вақтинча бўлиб турган барча ўзбекистонликларни қонунларга ҳурмат билан ёндашишга чақирди.

Мамлакат қонунларини билмаслик жавобгарликдан озод қилмайди, дейилади баёнотда. Рухсатсиз фото ва видеога олиш, хусусан, аёллар ёки болаларни яширин суратга олиш ҳолатлари қаттиқ назоратга олинган.

Нима қилиш керак?

- Бегона шахсларни суратга олишдан аввал, албатта рухсат сўранг.
- Жамоат жойларида ҳам шахсий масофа ва ҳурматни сақланг.
- Аҳлоқий ва маданий меъёрларга амал қилинг.
- Маҳаллий қонун-қоидалар билан таниш бўлинг. «Замин»ни Telegram’да ўқинг!