Ўзбекистон мерганлари Туркияда олтин медал билан тақдирланди

Ўзбекистон Мудофаа вазирлиги ҳарбийлари Туркияда бўлиб ўтган “Энг илғор мерганлар жамоаси” V халқаро мусобақасида барча рақибларини ортда қолдириб, фахрли 1-ўринни эгаллади ва олтин медал билан тақдирланди. Бу ҳақда Мудофаа вазирлиги матбуот хизмати хабар берди.

Мусобақа географияси кенг, рақобат кескин

5–16 май кунлари Туркиянинг Испарта шаҳридаги “Командо” тоғ-ўқув марказида ўтган ушбу нуфузли мусобақада 15 та давлатдан ташриф буюрган 48 жамоа иштирок этди. Улар орасида Туркия, Покистон, Қатар, Озарбайжон, Италия, БАА, Кувайт ва бошқа давлатлар бор эди.

Қатнашчилар 15 га яқин мураккаб ва юқори динамикага эга бўлган шароитларда ўзаро беллашишди. Шартлар нафақат жисмоний тайёргарликни, балки аниқлик, руҳий барқарорлик ва жамоавий ҳамжиҳатликни ҳам талаб қиларди.

Ҳақиқий жанговар сценарийлар асосида баҳслар

Мусобақа доирасидаги шартлар қуйидагиларни қамраб олди:

• юқори бурчак остида ўқ узиш;
  
• газниқобда ўқ отиш;
  
• ноаниқ масофаларга ёпиқ позитсиядан ўқ отиш;
  
• турли тўсиқлар ортидан ўқ узиш;
  
• вертолётдан ва қайиқдан ўқ отиш;
  
• тунда ва “сюрприз” шароитида ўқ узиш.
  

Шунингдек, 5 км масофани юк ва қурол билан босиб ўтиб, совуқ қуролдан аниқ ўқ узиш сингари ўта талабчан техник машқлар ҳам ўтказилди.

Ўзбекистон жамоаси тажриба ва маҳоратини намоён этди

Ўзбекистон бу мусобақада 4-маротаба иштирок этиши бўлди. Олдинги йиллардаги тажриба ҳам ўз самарасини берди — 2022 ва 2023 йиллардаги кумуш медалдан сўнг, 2024 ва 2025 йилларда кетма-кет икки марта олтин медал қўлга киритилди.

Эслатиб ўтамиз, 2025 йил март ойида ҳам Ўзбекистон ҳарбийлари АҚШда ўтказилган “Энг илғор жангчи–2025” мусобақасида ҳам рекорд натижа билан ғолиб бўлишган эди.

Zamin.uz таҳририятидан:
Ўзбекистон армиясининг халқаро миқёсдаги бу каби муваффақиятлари нафақат ҳарбий тайёргарлик даражасининг юксаклигини, балки Ватанни муносиб ҳимоя қилиш салоҳиятини кўрсатиб турибди. Мерганларимизга янада улкан зафарлар тилаймиз! «Замин»ни Telegram’да ўқинг!