Австралиялик аёл турникда тортилган ҳолда дунё рекордини ўрнатди (видео)

Гиннеснинг рекордлар китоби яна бир ажойиб натижа билан янгиланди: Австралиялик 34 ёшли Оливия Винсон 24 соат ичида турникда тортилиш бўйича жаҳон рекордини ўрнатиб, дунёга ўзининг ғаройиб иродасини намойиш қилди.

Бу ҳақда UPI нашри хабар тарқатди. Маълум бўлишича, рекордни янгилаш ғоясини унга эри ва шахсий мураббийи билдирган экан. Дастлаб бу таклиф Оливияга шунчалик мумкин эмасдек туюлганки, у бу гапни эшитиб кулган. 2021 йилда Полшадан бўлган спортчи Паула Горло 4081 марта тортилиб, бу соҳада ўз номи билан тарихда қолган эди. Ана шу рекордни ортда қолдиришнинг имкониятини кўрсатган ҳисоб-китоблардан кейин Винсон ўзида бу вазифани бажаришга куч топган.

Бироқ биринчи уриниш унинг учун жуда оғир кечди. 2024 йил сентябрида у қатъий машғулотлардан сўнг рекордни янгилашга уриниш қилди, лекин машғулот жараёнида олган жароҳати сабабли, яъни билак мушаклари пайининг чўзилиши оқибатида рекордни янгилаш мақсадидан воз кечишга мажбур бўлди.

Лекин бу омадсизлик ҳам унинг иродасини синаб кўришига тўсқинлик қилолмади. Икки ой мобайнида Винсон соғлигини қайта тиклади ва яна кўплаб машғулотлардан сўнг, қайтадан рекордни янгилашга киришди. Бу сафар австралиялик аёл ўзи истаган натижага эришишга муваффақ бўлди.

Рекорд куни Винсон 24 соат ичида ажойиб натижа кўрсатиб, жами 7079 марта тортилишни уддалади. Бу дегани, ҳар бир дақиқада ўртача беш марта тортилишни англатади. Ушбу давомли машқ жараёнида Оливия 19-соатга келиб, қаттиқ кўнгил айнишини ҳис қила бошлаганини айтади:

“Мен ўз танамни бундай чегараларгача етказишим мумкинлигига ишонмаган эдим. Машқ жараёнида ҳаддан ташқари чарчоқ ҳисси пайдо бўлди, лекин руҳий чидамим мени мақсадимдан қайтара олмади. Бу ерда ҳамма нарса аслида инсон иродасининг қанчалик кучли эканлигини намоён этди”, — дейди у.

Винсоннинг бу натижаси нафақат унинг шахсий ҳаёти, балки спорт олами учун ҳам катта аҳамият касб этади. У ўз мисоли билан инсон имкониятларининг чексизлиги, ўз олдига юқори марраларни қўйган ҳар қандай инсон уларни забт эта олишини кўрсатди.

Эслатиб ўтамиз, жорий йилнинг март ойида Японияда яшовчи 108 ёшли Шицуи Хакоиси энг кекса фаол сартарош сифатида Гиннес рекордлар китобига киритилган эди. Шу ойда цирк артисти Лейла Нун эса ўзининг сочларидан осилиб туриш бўйича ҳам рекорд натижани янгилади. У жами 25 дақиқа 11,3 сония сочидан осилиб турган ҳолда рекордга эришган эди.

Дунё Гиннес рекордлари китоби яна бир бор инсон иродасининг чексизлигини кўрсатди ва бу галги қаҳрамон Оливия Винсон бўлди.