АҚШ президенти Доналд Трамп Украинадаги урушни бартараф этиш борасида Россия раҳбари Владимир Путин билан мулоқот ва ҳамкорлик давом этмаса, Вашингтон томонидан Москвага қарши қўшимча чоралар қўлланилиши эҳтимолини очиқ эътироф этди.
Ушбу баёнот 3 сентябр куни Овал кабинетда Полша президенти Карол Навроцкий билан икки томонлама учрашувдан сўнг берилди. Президент нутқидан парчалар Оқ уйнинг Х ижтимоий тармоғидаги расмий саҳифасида эълон қилинди.
«Путин менинг позициямни жуда яхши билади ва у барибир бир қарорга келиши шарт, – деди Трамп. – Қарор қандай бўлишидан қатъи назар, биз ёки қабул қиламиз, ёки рад этамиз. Агар рад этсак, натижасини яқин вақтларда ўзингиз кўрасиз», — дея изоҳ берди у.
Бироқ Трамп шу билан бирга, россиялик ҳамкасбига ҳозирча аниқ мурожаат ёки талаб йўлланмаганини алоҳида қайд этди.
Матбуот вакилларидан бири АҚШ президентидан лавозимга киришганидан бери Москвага нисбатан кескин чоралар кўрилмагани ҳақида савол берди.
«Сиз Ҳиндистонга қарши жорий этилган иккиламчи санкцияларни ҳисобга олмаяпсиз. Бу орқали Россия юзлаб миллиард доллар йўқотди. Сиз бунга ҳамон ҳаракатсизлик дейсизми? Мен ҳали иккинчи ва учинчи босқичга ўтганим йўқ», — деб жавоб берди Трамп.
Эслатиб ўтамиз, бир кун аввал Трамп Россия раҳбаридан «ҳафсаласи чалғиб қолганини» яна бир бор таъкидлаган, аммо бу норозилик айнан нимадан келиб чиққанини очиқламаган эди.
Аввалроқ эса Оқ уйдаги брифингда Трамп шундай деган: агар Украинадаги низо борасида олдинга силжиш кузатилмаса, АҚШ «бошқа йўналишни танлаши» мумкин. Президентнинг таъкидлашича, у ҳозир ҳам воқеалар ривожини диққат билан кузатмоқда ва Украинадаги можаро юзасидан «жуда қизиқ маълумотларни» қўлга киритган, уларни яқин кунларда эълон қилиши мумкин.
«Замин»ни Telegram’да ўқинг!
