Financial Times нашри ёзишича, август ойида Аляскада ўтган Доналд Трамп ва Владимир Путин учрашуви кутилган натижани бермади. Манбаларнинг таъкидлашича, АҚШ президенти Украина бўйича келишув муҳокамаси ўрнига Россия раҳбарининг ўрта асрлар тарихи ҳақидаги узун маърузасини эшитишга мажбур бўлган.
Маълумотларга кўра, Путин Трамп таклиф этган “ўт очишни тўхтатиш эвазига санкцияларни юмшатиш” вариантини рад этган. Унинг талаблари анча кескин бўлиб, Украинадан тўлиқ таслим бўлиш ва Донбассдаги ҳали босиб олинмаган ҳудудларни ҳам Россияга топширишни ўз ичига олган.
Ёпиқ эшиклар ортида ўтган суҳбат давомида Путин Трампга тарихий “экскурсия” уюштирган — Рюрик, Ярослав Мудрий ва Богдан Хмелницкий ҳақида сўзлаб, Россия ва Украина “бир миллат” деган ғоясини асослаган. FT манбаларига кўра, Трамп бу гаплардан жуда ҳам ҳайратда қолган ва ҳатто учрашувни тарк этиш билан таҳдид қилган.
Натижада музокаралар муддатидан олдин якунланган, шунингдек, икки делегация иштирокида ўтказилиши режалаштирилган иқтисодий тушлик ҳам бекор қилинган. Трамп Қрим аннексиясини тан олиш ва Украина қўшинларини Донбассдан қисман чиқариш таклифини берган, бироқ Путин буни рад этиб, бутун минтақани талаб қилган.
Саммитдан сўнг икки етакчи ўртасидаги муносабатлар кескин ёмонлашган. АҚШ раҳбари Трамп Путиннинг “музокара услубидан” норози бўлиб, Европа иттифоқчиларига Украина учун Америка захираларидан қурол сотиб олишга рухсат берди. Шунингдек, Киевга Москвагача етадиган Tomahawk ракета тизимларини етказиб бериш бўйича муҳокама бошланган. Россия нефтини сотиб олишни давом эттираётган Ҳиндистонга эса АҚШ 25 фоизлик қўшимча бож жорий этди.
Шу билан бирга, FT қайд этишича, Путин омма олдида Трампга нисбатан хушомадона муносабатни сақлаб қолмоқда. У Чарли Киркнинг ўлдирилиши муносабати билан ҳамдардлик билдирган ва Трампни “тинчлик учун Нобел мукофотига лойиқ” деб атаган.
Politico нашри ёзганидек, саммит оммавий ахборот воситаларида “Путиннинг ғалабаси” сифатида ёритилиши Трампни қаттиқ ғазаблантирган. Шу билан бирга, Оқ уй FT’га билдирган расмий изҳорда Аляскадаги музокараларни “самарали” деб атади ва унинг “муваффақиятсиз ўтгани ҳақидаги гапларни асоссиз” деб ҳисоблади.
Маъмурият вакилининг таъкидлашича, “Вашингтон Россиянинг позициясини яхшироқ англаш учун ҳар қандай мулоқотни фойдали деб билади”.
“Zamin”ни Telegram'да ўқинг!
