Трампга таҳдидми? Аэропорт яқинида снайпер минораси аниқланди

АҚШ Махфий хизмати Флоридада жойлашган Палм-Бич аэропорти яқинида шубҳали снайперлик минорасини аниқлади. Бу ҳақда ABC News телеканали хабар берди.

Маълумотларга кўра, минора Доналд Трамп самолётдан тушиши кутилган жойга қаратилган ҳолда ўрнатилган бўлган. Топилма Трамп ташрифига бир кун қолганда аниқланган.

Федерал қидирув бюроси директори Кеш Пателнинг сўзларига кўра, ҳозирча мазкур миноранинг қайси шахс ёки ташкилотга тегишли экани маълум эмас. Тергов ҳаракатлари давом этмоқда.

NBC News манбаларининг таъкидлашича, снайперлик минораси аэропорт йўлининг нариги тарафида — хусусий самолётлар, жумладан Трампнинг шахсий самолёти турадиган ҳудудга қарши томонда жойлашган.

Ҳуқуқни муҳофаза қилиш органлари ҳозирда ҳудудни тўлиқ текширувдан ўтказмоқда ва эҳтимолий хавф манбаларини аниқлаш билан шуғулланмоқда.

Чарос Заркараева

«ZAMIN.UZ» муҳаррири