АҚШ президенти Доналд Трамп ва Россия раҳбари Владимир Путин ўртасида Будапештда ўтказилиши кутилган саммитга тайёргарлик ишлари вақтинча тўхтатилди. NBC News мухбири Гаррет Ҳаакенинг Оқ уйдаги манбасига кўра, Вашингтон ҳар икки томонни “музокараларга ҳали тайёр эмас” деб ҳисобламоқда.
Журналистнинг маълум қилишича, Марко Рубио ва Сергей Лавров ўртасидаги телефон орқали мулоқот “сермаҳсул” ўтган бўлса-да, Трамп музокараларни ҳозирча кечиктиришни маъқул кўрган. Оқ уй ҳам расман президент яқин орада Путин билан учрашишни режалаштирмаётганини тасдиқлади.
CNN манбаси эса саммитнинг қолдирилишига Россиянинг “ҳаддан ташқари максималистик позицияси” сабаб бўлганини ёзди. Манбаларга кўра, Рубио ва Лавров Украина можаросини ҳал этиш бўйича турлича қарашга эга бўлган.
Шунингдек, Россия Ташқи ишлар вазирлиги ҳам бу ҳақда изоҳ берди. Сергей Рябковнинг сўзларига кўра, ҳозирча “бундай учрашувнинг аниқ вақти ёки жойи бўйича келишув мавжуд эмас”.
Трамп эса Зеленский билан учрашувдан сўнг Украинадаги фронт ҳолатини “мавжуд чизиқда музлатиш” таклифини билдирган эди. Бу таклифни Украина ва Европа етакчилари маъқуллаган бўлса-да, Москва буни Трамп ва Путиннинг олдинги келишувларига зид деб баҳоламоқда.
Лавровнинг таъкидлашича, Вашингтоннинг зудлик билан ўт очишни тўхтатиш чақириқлари можаронинг асл сабабларини ёпишга уринишдир. “Агар сиз шунчаки тўхтасангиз, тарих ҳақиқий сабабларни унутиб қўяди”, – деди у.
Шу тариқа, Будапештда бўлиши кутилган юқори даражадаги саммит тақдири ҳозирча ноаниқлигича қолмоқда.
“Zamin”ни Telegram'да ўқинг!
