Раҳмонулло Л. суд олдида: оғир айбловлар
АҚШ Миллий гвардияси ҳарбийларига ўқ отганликда гумон қилинган Афғонистон фуқароси Раҳмонулло Л. суд олдида жавоб берди. Қўлга олиш чоғида яраланган айбланувчи суд эшитувида шифохонадан туриб онлайн қатнашди. Вашингтондаги эшитув пайтида унинг адвокати мижози номидан ҳужум ва биринчи даражадаги қасддан одам ўлдириш каби оғир айбловлар бўйича айбни тан олмаслик тўғрисида баёнот берди. Ҳимоячи айбланувчини аввал судланмаганини таъкидлаб, уни ҳибсдан озод қилишни сўради.
Ҳужум ва қурбонлар
Фожиа 26 ноябр куни Оқ уйдан унчалик узоқ бўлмаган Фаррагут майдонида содир бўлган. Раҳмонулло Л. тўсатдан хизмат олиб бораётган ҳарбийларга ўқ узган. Натижада 20 ёшли ҳарбий хизматчи Сара Бекстрам жиддий жароҳат олди ва кейинчалик шифохонада вафот этди. Яна бир миллий гвардиячи, 24 ёшли Эндрю Вулфнинг ҳаёти учун шифокорлар курашмоқда.
Гумонланувчи АҚШга 2021 йилда Афғонистондан кириб келган. У ватанида Америка махсус хизматлари билан ҳамкорлик қилган, шунинг учун «Толибон» ҳокимиятга келгач, кўчиб ўтиш ҳуқуқини қўлга киритган. Қизиғи шундаки, у 2024 йилда бошпана сўраб ариза топширган ва Трампнинг иккинчи инаугурациясидан сўнг 2025 йил бошида уни олган.
Трампнинг кескин реакцияси ва визалар тўхтатилди
Оқ уй раҳбари Доналд Трамп ҳужумни «қўрқинчли» деб атади ва Жо Байден даврида Афғонистондан кириб келган барча хорижий фуқароларни қайтадан синчковлик билан текширишга буюрди. Президент «бу ерда бўлиши керак бўлмаган ҳар қандай хорижий шахсни депортация қилиш учун зарур бўлган барча чоралар кўрилишини» айтди.
Отишмага жавобан АҚШ Фуқаролик ва иммиграция хизмати (USCIS) бошпана бериш тўғрисидаги барча аризалар кўриб чиқилишини муваққат тўхтатди. USCIS раҳбари Жозеф Эдлоу чекловлар «ҳар бир хорижий шахсни имкон қадар чуқур текшириш имкони таъминлангунига қадар» амал қилишини билдирди. Шунингдек, АҚШ Давлат департаменти ҳам Афғонистон фуқароларига виза беришни тўхтатиб туришини эълон қилди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
