Қозоғистоннинг Ақмола вилояти, Бурабай туманига қарашли Шчучинск шаҳрида жойлашган “Ош маркази” овқатланиш масканида юз берган портлаш ва ундан кейинги ёнғин оғир оқибатларга олиб келди. Дастлабки маълумотларда камида олти киши ҳалок бўлгани, тахминан 20 нафар одам жабрлангани айтилди. Кейинроқ Қозоғистоннинг Qazinform агентлиги қурбонлар сони етти нафарга етгани, жабрланганлар эса 19 нафар эканини ёзди.
Хабарларга кўра, фожиа тунда содир бўлган ва воқеа жойига тезкор тарзда қутқарув хизматлари етиб борган. Ўт ўчирувчилар аланга ичида қолган бинодан саккизта газ баллонини олиб чиқишга муваффақ бўлган, шунингдек, ўн нафардан ортиқ кишини хавфли ҳудуддан қутқариб чиққан. Бу эса ҳалокат кўламини янада катталашиб кетишининг олдини олган муҳим омиллардан бири бўлди.
Расмий маълумотларга кўра, Москва вақти билан соат 22:40 ҳолатига бориб ёнғин тўлиқ бартараф этилган. Айни пайтда портлаш ва ёнғиннинг аниқ сабаблари, шунингдек, ҳодисага олиб келган омиллар юзасидан текширув ишлари олиб борилмоқда. Qazinform маълумотига кўра, ушбу ҳолат ортидан жиноий иш ҳам қўзғатилган.
Ҳодиса жойида фавқулодда вазиятлар хизмати ходимлари, маҳаллий ҳокимият вакиллари, шифокорлар, полиция, шунингдек, газ-техник назорат мутасаддилари иш олиб бормоқда. Қутқарувчилар вайроналарни тозалаш, жароҳат олганларга ёрдам кўрсатиш ва ҳодисанинг барча тафсилотларини тиклаш билан банд.
Бу фожиа бутун минтақа учун оғир хабар бўлди. Одатий бир овқатланиш масканида рўй берган бу ҳалокат бир лаҳза ичида бир неча оиланинг ҳаётини издан чиқарди. Ҳозир энг муҳим масала — жабрланганларнинг аҳволи, сабабларнинг тўлиқ очиқланиши ва бундай кулфат яна такрорланмаслиги учун қатъий хулоса чиқарилишидир.
“Zamin”ни Telegram'да ўқинг!
