Эрон атрофида юзага келган кескин вазият Ғарб ҳарбий-сиёсий блокида янги зиддиятлар пайдо бўлишига сабаб бўлмоқда. Айниқса, АҚШ ва унинг Европадаги иттифоқчилари ўртасида стратегик масалаларда қарашлар тобора фарқланиб бораётгани кузатилмоқда.
Маълум қилинишича, АҚШ ҳукумати иттифоқчи давлатларни Ҳормуз бўғози хавфсизлигини таъминлаш бўйича фаолроқ иштирок этишга чақирган. Ушбу ҳудуд глобал нефт ташиш йўлларининг энг муҳим нуқталаридан бири ҳисобланади ва ундаги ҳар қандай беқарорлик бутун дунё энергетика бозори учун хавф туғдиради.
Бироқ Германия ҳамда қатор бошқа Европа давлатлари бу ташаббусга эҳтиёткорона муносабат билдирмоқда. Уларнинг фикрича, мазкур масала НАТОнинг бевосита вазифаларига кирмайди.
Эксперт Нико Ланге бу борада ўз хавотирларини билдириб, вазият жиддий оқибатларга олиб келиши мумкинлигини таъкидлади. Унинг сўзларига кўра, Доналд Трамп томонидан олиб борилаётган Эрон билан қарама-қаршилик сиёсати НАТО ичида чуқур инқирозни юзага келтириши мумкин.
“Бу можаро нафақат алянс ичидаги бирдамликни заифлаштиради, балки Украинага оид лойиҳалар ва АҚШнинг Европа хавфсизлигига бўлган содиқлигини ҳам шубҳа остига қўяди”, — дея қайд этади мутахассис.
Таҳлилчиларга кўра, агар томонлар ўртасидаги келишмовчиликлар давом этса, бу НАТО ичидаги ҳамкорликка салбий таъсир кўрсатиши, ҳаттоки узоқ муддатли стратегик режаларга ҳам путур етказиши мумкин. Шу тариқа, Эрон атрофидаги вазият нафақат минтақавий, балки глобал миқёсдаги сиёсий мувозанатга ҳам таъсир кўрсатмоқда.
“Zamin”ни Telegram'да ўқинг!
