Нодир генетик ўзгариш: Ҳиндистон ўрмонларида ноёб "қора йўлбарслар" яшайди

Ташқи кўринишидан фантастик фильм қаҳрамонини эслатувчи "қора йўлбарслар" ҳақиқатан ҳам мавжуд. Улар тўлиқ қора рангда эмас, балки псевдомеланистик йўлбарслар ҳисобланади.

Бу камёб ҳайвонлар асосан Ҳиндистоннинг Одиша штатидаги Симилипал йўлбарс қўриқхонасида учрайди. Уларнинг қора чизиқлари оддий йўлбарсларникига қараганда анча кенг ва бир-бирига яқин жойлашган. Шу сабаб танасидаги тўқ сариқ рангнинг катта қисми кўринмай қолади.

Мутахассислар бундай ташқи кўринишни нодир генетик ўзгариш билан боғлайди. Йўлбарс узоқдан деярли қора бўлиб кўринса-да, яқиндан унинг сариқ жунлари ва кенгайган чизиқларини фарқлаш мумкин.

Симилипалдаги бу йўлбарслар дунёдаги энг камёб йирик мушуклардан бири саналади. Ёввойи табиатда уларнинг сони жуда оз қолган.