Дунёдаги энг чиройли сўз эълон қилинди

Халқаро ҳакамлар ҳайъати дунёдаги энг чиройли сўзни аниқлади. Ғолиб сифатида Янги Зеландиянинг туб аҳолиси — маорилар тилидаги «kaitiakitanga» сўзи танланди.

Мутахассисларнинг таъкидлашича, ушбу сўз табиатни асраш, атроф-муҳитга масъулият билан муносабатда бўлиш ва уни келажак авлодлар учун авайлаб сақлаш ғоясини ифодалайди. Ғолибни танлашда сўзнинг нафақат жарангдорлиги, балки унинг чуқур маъноси, маданий аҳамияти ҳамда бугунги дунё учун долзарблиги ҳам асосий мезонлардан бири бўлган.

Танловда дунёнинг 75 дан ортиқ тилидан 223 та сўз иштирок этди. Финал босқичига португал тилидаги «saudade», япон тилидаги «ikigai», уэльс тилидаги «hiraeth», зулу тилидаги «ubuntu» ҳамда идиш тилидаги «luftmensch» каби машҳур ва ўзига хос маънога эга сўзлар ҳам етиб келган.

Танлов ташкилотчиларининг қайд этишича, лойиҳа турли халқлар тилларида учрайдиган, бошқа тилларга тўлиқ ва аниқ таржима қилиб бўлмайдиган ноёб сўзларни кенг жамоатчиликка танитиш, уларнинг маъноси ҳамда маданий қадриятини тарғиб қилишни мақсад қилган.