Шўрва тайёрлаш жараёнида юзада ҳосил бўладиган кўпик ҳақида баҳслар йиллар давомида тўхтамай келмоқда. Кимдир уни зарарли моддалар деб ҳисоблаб, албатта олиб ташлашни тавсия этади, бошқалар эса унинг фойдали эканини таъкидлайди.
Мутахассислар таъкидлашича, бу кўпикнинг таркиби табиий бўлиб, асосан гўштдаги оқсил моддалари — ивиган албумин ва миоглобин, оз миқдордаги ёғ қатламлари ҳамда табиий тузлар аралашмасидан иборат. Яъни бу шўрвадаги гўшт ёки суякнинг пишиш жараёнидаги табиий оқибат ҳисобланади.
Илмий жиҳатдан олиб қаралганда, шўрва кўпигида антибиотик ёки инсон соғлиғи учун хавфли бўлган моддалар йиғилишига оид бирор далил мавжуд эмас. Демак, уни соғлиққа зарарли деб аташ учун асос йўқ.
Бироқ кўпчилик ошпазлар ва хонадон эгалари эстетик жиҳатга кўпроқ эътибор қаратади. Агар шўрва юзасидаги кўпик олинмаса, суюқлик бироз хира тус олиши мумкин. Шу боис тиниқ шўрва тайёрлашни истаганлар кўпикни эҳтиёткорлик билан олиб ташлайди.
Шу билан бирга, кўпикни олиб ташлаш фойдали моддаларни йўқотиш дегани эмас. Коллаген, аминокислоталар ва минерал моддалар барибир шўрвада сақланиб қолади. Демак, кўпикни олиш ёки қолдириш ҳар кимнинг шахсий танлови ва таъбга боғлиқ қарор.
Мутахассислар хулоса қилади: шўрва кўпигини олиб ташлаш соғлиқ учун шарт эмас — бу кўпроқ таом кўриниши ва таъб масаласи. Асосийси, гўшт сифатли бўлиши ва шўрва гигиеник қоидаларга риоя қилинган ҳолда тайёрланишидир.
“Zamin”ни Telegram'да ўқинг!
