Макадамия нафақат ноёб таъми, балки инсон саломатлиги учун катта фойдаси билан ҳам қадрланади. Унинг юмшоқ, қаймоқсимон ва енгил ванилга ўхшаш таъми кўпчиликка ёқади. Шу билан бирга, таркибида организм учун муҳим бўлган қимматли моддалар жуда кўп.
Макадамиянинг асосий фойдалари
Макадамия таркибининг катта қисми қимматли ёғ кислоталаридан иборат. Улар юрак-қон томир тизимини қўллаб-қувватлайди ва “ёмон” холестеринни камайтиришга ёрдам беради.
Витамин ва минераллар манбаи
Ушбу ёнғоқ E ва B гуруҳи витаминлари, магний, калий, темир ҳамда рухга бой. Бу моддалар иммунитетни мустаҳкамлайди, асаб тизимини тинчлантиради ва тери ҳолатини яхшилайди.
Тўқлик ҳиссини беради
Макадамия таркибидаги оқсил ва клетчатка узоқ вақт тўқлик ҳиссини сақлаб туради ва ҳазм жараёнини яхшилайди.
Макадамияни меъёрида истеъмол қилиш муҳим
Бу ёнғоқ юқори калорияли маҳсулот ҳисобланади. 100 граммида тахминан 720 ккал мавжуд. Шу сабабли кунига 5–7 дона истеъмол қилиш етарли бўлади.
Сифатли макадамияни қандай танлаш керак?
Ёнғоқ сотиб олаётганда унинг ранги оч кремсимон бўлишига, ёқимсиз ҳид чиқмаслигига ва қадоқи ҳаво ўтказмайдиган бўлишига эътибор бериш лозим. Қовурилган турини олсангиз, туз ва сунъий қўшимчаларсиз вариантини танлаган маъқул.
Макадамияни қандай чақиш мумкин?
Макадамиянинг пўстлоғи жуда қаттиқ бўлади. Агар ёнғоқ олдиндан ёрилган бўлса, махсус металл калитча ёрдамида осон очилади. Ёрилмаган бўлса, ёнғоқ чақувчи мослама ёки қисқичдан фойдаланилади. Кўпчилик учун энг қулай вариант — тозаланган макадамия харид қилиш.
“Zamin”ни Telegram'да ўқинг!
