Она қучоғидаги хазина...

Бир аёл саховати тилларга тушган, жўмардлиги билан танилган кекса олимнинг олдига борибди ва унга шундай дебди:
- Бу шаҳарда мендан фақир одам йўқ! Менга ёрдам бера оласизми?

Олим аёлнинг қучоғидаги боланинг ипакдай мулойим ёноқларини силаб, ўпибди ва шундай жавоб қилибди:
- Демак, сен фақирсан? Ниҳоятда қашшоқ, фақир. Аммо таъмасиз ёрдам беролмайман-да. Агар ёрдам беришимни истасанг, болангнинг бармоғини сотишинг керак...

Аёл аввалиги олимни тентак хаёл қилибди, сўнг жуда қалтис ҳазиллашганини ўйлабди. Аммо олим жиддий қиёфада аёлга бир коса олтин узатиб:
- Оёқчасининг бармоғига ҳам розиман!- дебди.- Хавотирланма, моҳир жарроҳман, гўдагинг оғриқ сезмайди.

Аёл қонини қайнатган бу таклифдан қўрқиб, қочиш учун ҳозирланаётганда олим:
- Фақат тирноқчасини қўпариб олсам ҳам бўлади! - деб давом этибди. – Вақт ўтиб ўрнига янгиси чиқади.

Аёл бу жинни одамга ортиқ тоқат қилолмай, эшикдан отилган экан, олим шундай дебди:
- Қанақасига қашшоқ бўласан сен, эй, аёл? Қучоғингдаги хазинанинг тирноқчалик бўлагини бир коса олтинга алмашмадинг-ку!..

Манба: Azon.uz «Замин»ни Telegram’да ўқинг!