Ўзбекистон Қувайтдан авиация ёқилғисини харид қилиш масаласини кўриб чиқмоқда. Инвестициялар, саноат ва савдо вазири Лазиз Кудратовнинг Қувайт Давлатига амалий ташрифи доирасида бир қатор юқори даражадаги учрашувлар ўтказилди.
Жумладан, Қувайт нефт вазири ҳамда Kuwait Petroleum Corporation раиси Тареқ Сулеиман Ал-Роуми, шунингдек савдо ва саноат вазири Халифа Ал-Аскар билан музокаралар бўлиб ўтди. Учрашувларда нефт-газ ва нефт-кимё соҳаларида ҳамкорликни ривожлантириш, логистика ва савдо алоқаларини кенгайтириш, Ўзбекистон авиакомпаниялари учун авиация ёқилғисини етказиб бериш масалалари муҳокама қилинди.
Шунингдек, Ўзбекистон томони мева-сабзавот маҳсулотлари экспортини ошириш, стандартларни ўзаро тан олиш ва лабораторияларни аккредитация қилиш бўйича ҳамкорликка қизиқиш билдирди.
Қувайт Давлатининг электроэнергетика, сув ресурслари ва қайта тикланувчи энергетика вазири, шунингдек молия ҳамда иқтисодий масалалар ва инвестициялар бўйича вазир вазифасини бажарувчи доктор Сабиҳ Абдулазиз Ал-Муҳайзим билан ўтказилган учрашувда инвестициявий ҳамкорликни чуқурлаштириш ва икки томонлама савдони кенгайтириш масалалари муҳокама қилинди. Томонлар, шунингдек, «Форс кўрфази мамлакатлари – Марказий Осиё» Тараққиёт жамғармасини ташкил этиш ташаббусини кўриб чиқди.
Ўзбекистон–Қувайт Ҳукуматлараро қўшма комиссиясининг иккинчи йиғилиши доирасида эришилган келишувларни амалда илгари суриш ва ҳамкорликни янада ривожлантиришга ўзаро тайёрлик тасдиқланди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
