Тошкент–Хўжакент темирйўли Чиноркентгача узайтирилди

^{Фото: Тошкент минтақавий темирйўл узели}
Тошкент–Хўжакент электропоезди қатнови «Чиноркент» бекатигача узайтирилди. Бу ҳақда Тошкент минтақавий темирйўл узели хабар берди.

Хўжакентдан Чиноркентгача 1,5 км масофага темирйўл қурилди, шунингдек, “Чиноркент” темирйўл бекати қуриб битказилди ҳамда 22 январ куни фойдаланишга топширилди.

Бу ерда 150 м узунликда перрон ҳамда соябон қурилиб, имконияти чекланган йўловчилар учун сирғанишга қарши плиталар ўрнатилди ҳамда йўловчилар учун ерости туннели барпо этилди.

Эндиликда Тошкентдан йўлга чиққан йўловчилар, сайёҳлар замонавий электропоездда “Чиноркент” темирйўл бекатига етиб келиши мумкин.

Эслатиб ўтамиз, ушбу йўналишда янги электропоезд 2024 йил декабр ойидан қатнай бошлаган.

22 январ куни, шунингдек, 23,8 километрлик Байтқўрғон–Паркент электрлаштирилган темирйўли қурилишига старт берилди.

“Ўзбекистон темирйўллари” хабарига кўра, янги йўналиш “Боштранслойиҳа” АЖ томонидан лойиҳалаштирилган. Қурилиш ишларини темирйўлчилар амалга оширади.

Лойиҳа доирасида 2 та ажратиш пункти, 4 та кўприк, 2 та йўл ўтказгич, 1 та туннел туридаги йўл ўтказгич, 78 та сув ўтказиш иншооти, 7 та автомобил йўли ва темир йўли кесишмаси қурилиши режалаштирилган.

“Ушбу янги лойиҳа якунига етиб, фойдаланишга топширилгач, Паркент туманининг тоғли сўлим гўшаларига ташриф буюрувчилар, айниқса, сайёҳлар оқими сезиларли даражада ортишига замин яратилади”, – дейилади хабарда.
“Замин” янгиликларини “Telegram”да кузатиб боринг