Анчелоттининг Бразилия терма жамоасини бошқаришига мамлакат президенти қандай муносабат билдирди?

Мадриднинг "Реал" клубидан кетиши аниқ бўлган италиялик мураббий Карло Анчелотти тез орада Бразилия миллий терма жамоасининг бош мураббийи лавозимида иш бошлайди. Бу янгилик халқаро футбол ҳамжамияти орасида катта қизиқиш уйғотди.

65 ёшли мутахассиснинг лавозимга тайинланиши ҳақидаги хабарларга Бразилия президенти Луис Инасиу Лула да Силва ҳам ўз фикрини билдириб ўтди. Мамлакат раҳбари, "O Globo" нашрига кўра, миллий терма жамоанинг маҳаллий мутахассислар томонидан бошқарилишини маъқуллайди.

"Анчелотти ўзининг юқори тажрибаси ва профессионаллигини ҳисобга олиб, терма жамоага ёрдам бера олишига ишонаман. Мен принцип жиҳатдан хорижий мутахассисларга қарши эмасман, бироқ Бразилияда мамлакат терма жамоасини бошқариш учун етарли даражада малакали ва иқтидорли мураббийлар мавжуд," – дея таъкидлади Луис Инасиу Лула да Силва.

Карло Анчелотти терма жамоа бошқарувига киришган пайтидан бошлаб, жаҳондаги энг юқори маош оладиган терма жамоалар мураббийлари қаторига қўшилади. Маҳаллий футбол федерацияси Анчелоттига йиллик 9 миллион евро маош ваъда қилган. Бундан ташқари, агар терма жамоа 2026 йилдаги жаҳон чемпионатида ярим финалгача етиб борса, унинг маоши автоматик равишда 11 миллион еврога кўтарилади.

Анчелоттининг Бразилия терма жамоасидаги фаолияти нафақат маҳаллий, балки бутун жаҳон футболида ҳам катта қизиқиш билан кузатилмоқда. Футбол экспертлари ва мухлислари терма жамоанинг янги мураббий билан қандай натижаларга эришишини интиқлик билан кутишмоқда. «Замин»ни Telegram’да ўқинг!