«Фенербахче»нинг собиқ ярим ҳимоячиси Линколн клубни 2024–2025 йилларда бошқарган Жозе Моуринё ҳақида кескин фикр билдирди. Бу ҳақда euro-football.ru хабар беради.
Бразилиялик футболчи сўзларига кўра, португалиялик мутахассис унга берган ваъдасини бажармаган ва бу ҳолатни ҳурматсизлик деб қабул қилган. Линколн ижара асосида «Халл Сити»га кетишидан олдин Моуринё билан гаплашгани, мураббий эса уни Португалиядаги ёзги йиғинга кутаётганини айтганини эслади.
Футболчи мавсум якунлангач йиғинга чақирув бўлишини кутган, бироқ Моуринё билан бевосита боғлана олмаганини таъкидлади. Линколн таржимон орқали мураббийга чиқмоқчи бўлганида, Моуринё уни спорт директорига йўналтирган. Жамоа Португалияда йиғин ўтказаётган пайтда Линколн ҳам уйида Португалияда бўлганига қарамай, у Истанбулга юборилиб, алоҳида шуғулланиш топшириғини олган.
Линколн бу жараёнда ўзига нисбатан адолатсиз ва ҳурматсиз муносабат бўлганини айтди. Унинг таъкидлашича, у кўплаб ўйинларда ҳатто ўзи учун ноодатий позицияда ҳам клубга фойда келтиришга уриниб келган, оғир жароҳат ортидан эса қўллаб-қувватлаш кутган, аммо буни ҳис қилмаган.
«Фанатик» нашрига берган интервьюсида Линколн: «У жуда кўп ютуқларга эришган, бунга ҳеч ким эътироз билдирмайди. Лекин мен учун ҳаётда характер совринлардан ҳам муҳим», деди.
Ҳозирда Жозе Моуринё «Бенфика»ни бошқармоқда.
“Zamin”ни Telegram'да ўқинг!
