“Фенербахче”нинг собиқ футболчиси Линкольн Жозе Моуриньони кескин танқид қилди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.
Линкольн Fanatik нашрига берган интервьюсида Моуриньони ваъдасига содиқ бўлмаганликда айблади. “У жуда кўп ютуқларга эришган, буни ҳеч ким инкор этмайди. Аммо менга нисбатан ҳурматсизлик қилди. Мен учун ҳаётда характер совринлардан муҳимроқ”, — деди футболчи.
Унинг сўзларига кўра, “Ҳалл Сити”га ижара асосида кетишидан олдин Моуринью билан гаплашган ва мураббий ёзги йиғинга Португалияга чақиришини айтган. Мавсум якунлангач, Линкольн йиғинга таклиф кутган, бироқ кейинроқ таржимон орқали Моуринью билан боғланмоқчи бўлганида, мутахассис мулоқотдан бош тортиб, спорт директорга йўналтирган.
“Жамоа Португалияда эди, мен ҳам Португалияда уйимда эдим. Шунга қарамай, Моуринью мени Истанбулга қайтариб, алоҳида шуғулланишимни айтди. Мен билан адолатсиз ва ҳурматсиз муносабатда бўлишди”, — дея қўшимча қилди у.
Линкольн клуб учун турли ўйинларда, ҳатто ўзи учун ноқулай позицияда ҳам максимал ёрдам беришга ҳаракат қилганини, оғир жароҳатдан кейин эса етарли қўллаб-қувватловни сезмаганини таъкидлади. “Мен бошқалар каби машҳур эмасман, лекин доим майдонда боримни бераман”, — деди у.
Ҳозирда Жозе Моуринью “Бенфика”ни бошқармоқда.
“Zamin”ни Telegram'да ўқинг!
