Ла Лигада пешқадамлик кураши янада қизиди: Мичел бошқарувидаги «Жирона» ўз майдонида «Барселона»ни 2:1 ҳисобида мағлуб этиб, каталонияликларга кетма-кет иккинчи зарбани берди ва турнир жадвалининг тепасида Мадриднинг «Реал»ини қолдирди. Бу ҳақда euro-football.ru хабар беради.
Ушбу натижадан сўнг Килиан Мбаппе етакчилигидаги «Реал» «Барселона»ни 2 очкога ортда қолдирмоқда. «Монтиливи»даги ўйинда меҳмонлар аввал Пау Кубарси голи билан олдинга чиқди, аммо орадан икки дақиқа ўтиб Тома Лемар ҳисобни тенглаштирди. Якуний сўзни эса 86-дақиқада Фран Белтран айтди.
Учрашувдан кейин «Жирона»нинг ёрқин футболчилари алоҳида эътироф этилди. «Ривер Плейт» тарбияланувчиси, ҳуқуқи «Манчестер Сити»га тегишли бўлган Клаудио Эчеверри майдонга кечроқ тушганига қарамай, қисқа вақт ичида рақиб жарима майдони атрофида катта босим яратди ва ҳал қилувчи ҳужум олдидан тўпни олдинга олиб чиқишда муҳим рол ўйнади.
Захира ўйинчилари орасида энг катта фойда келтиргани эса «Райо» академиясидан чиққан Фран Белтран бўлди. У фаолият борасида Эчеверридан ортда қолган бўлса-да, самарадорликда ютди: жарима майдони чизиғидан аниқ зарба йўллаб, «Жирона»га ғалаба тақдим этди.
«Жирона»нинг украиналик футболчилари ҳам ўзини кўрсатди. Виктор Циганков ўнг қанотда тинимсиз ишлади, бир неча бор хавфли узатмалар берди ва прессингда фойдали ҳаракат қилди.
Владислав Ванат эса 73 дақиқа ичида доимий равишда ҳимоячилар ортидан бўш зоналарни топиб, кескинлик яратди. У Лемарнинг голига олиб келган ҳужумда фаол иштирок этди, яна бир нечта вазиятларда зарба позициясига чиқди. Якунда «Жирона»нинг айнан шу жамоавий фаоллиги «Барселона»дан очколарни тортиб олишга хизмат қилди.
“Zamin”ни Telegram'да ўқинг!
