Португалиянинг "Бенфика" клуби бош мураббий Жозе Моуринио ўрнига муносиб номзод топди. Лиссабонликлар айни дамда Англиянинг "Фулхэм" клубини бошқараётган Марко Силвани ўз сафига чорламоқчи. Бу ҳақда Goal.com хабар беради.
Ушбу вазият янги мураббий қидираётган Лондоннинг "Челси" клуби режаларига жиддий халақит бериши мумкин.
Моуринио 2027 йилгача шартномаси бўлишига қарамай, Мадриднинг "Реал" клубига қайтиши ҳақидаги хабарлар кўпайган. Шу сабабли "Бенфика" раҳбарияти бўшаб қолиши мумкин бўлган ўринни Силва билан тўлдиришни мақсад қилган.
Лондонликлар ҳам Лиам Розениор кетганидан сўнг айнан ушбу мутахассисни асосий номзодлар рўйхатига киритган эди.
"Челси" спорт директорлари жамоани барқарорлаштира оладиган тажрибали мураббий қидирмоқда. Ҳозирда жамоани вақтинча Калум Макфарлан бошқариб турибди.
Марко Силва "Фулхэм"да чиройли ўйин услуби шакллантиргани билан эътиборга тушган бўлса-да, унинг кучли олтилик клубларида тажрибаси йўқлиги Лондон клуби ичида баҳсларга сабаб бўлмоқда.
Силванинг "Фулхэм" билан амалдаги шартномаси 2026 йилнинг июнигача давом этади. Агар Моуринио ҳақиқатдан ҳам Мадридга йўл олса, икки клуб ўртасида португалиялик мутахассис учун жиддий кураш бошланиши кутилмоқда.
Ҳозирча "Челси" ўз ўрганишларини давом эттирмоқда, бироқ "Бенфика"нинг фаоллашиши уларни тезроқ қарор қабул қилишга мажбур қилиши мумкин.
“Zamin”ни Telegram'да ўқинг!
