Прогресс MS-34 кемаси ХКСга 2,5 тонна юк олиб кетди

Бойконур космодромидан Россиянинг "Прогресс MS-34" юк кемаси ортилган "Союз-2.1а" ракетаси муваффақиятли старт олди. Парвоздан бир неча дақиқа ўтгач, кема ракетанинг учинчи поғонасидан ажралиб, белгиланган орбитага чиқди. Бу ҳақда Ixbt.com хабар беради.

Ҳозирда умумий оғирлиги 7,4 тонна бўлган аппарат Халқаро космик станция (XKS) томон ҳаракатланмоқда.

Ушбу миссия доирасида станцияга жами 2,5 тоннага яқин юк етказилиши режалаштирилган. Юклар таркибидан 700 кг ёқилғи, 420 кг сув ва 50 кг кислород ўрин олган.

Шунингдек, кема бортида станция тизимлари ва экипаж учун 1,3 тоннадан ортиқ қуруқ юклар, жумладан, янги "Орлан-MKS" скафандри ҳам мавжуд.

Илмий тадқиқотлар учун мўлжалланган ушбу рейсда вазнсизликнинг инсон организмига таъсирини ўрганувчи VR-ускуналар ҳамда турли биологик тажрибалар учун махсус асбоблар юборилди. Режага кўра, кема 28 апрель куни Тошкент вақти билан тонгги соат 05:01 да ХКСнинг "Звезда" модулига туташиши лозим.

Nodirbek Razzokov

«ZAMIN.UZ» муҳаррири

+ Zamin.uz сайтини Googleга қўшинг