iPhone учун тўлов оилавий фожиага сабаб бўлди (видео)

Ҳиндистоннинг Маҳараштра штатида iPhone учун муддатли тўлов масаласидаги оилавий можаро даҳшатли фожиага айланди. Чҳатрапати Самбҳажинагар ҳудудидаги Тисгаон қишлоғида 18 ёшли Кунал Чандгуде ва унинг ота-онаси жарликдан қулаб, ҳалок бўлди. Бу ҳақда НДТВ ва бошқа маҳаллий нашрлар хабар берди.

22 август куни полиция берган маълумотларига кўра, Кунал iPhone'ни бўлиб тўлаш шарти билан сотиб олган ва навбатдаги тўловни амалга ошириш учун оиласидан пул сўраган. Маблағ масаласида отаси билан кескин тортишув юзага келган. Шундан сўнг йигит уйдан чиқиб, Тисгаон ҳудудидаги тепаликка борган ва жарлик четида қолган.

Воқеа жойига Куналнинг ота-онаси, маҳаллий аҳоли, полиция ҳамда ёнғин хавфсизлиги ходимлари етиб келган. Улар қарийб уч соат давомида йигитни хавфли жойдан қайтаришга уринган. Собиқ қишлоқ оқсоқоли Санжай Жадҳав ҳам Кунални фикридан қайтаришга ҳаракат қилган. Айрим одамлар эса унга янги iPhone олиб беришни ваъда қилган.

Гувоҳларнинг айтишича, Кунал барча илтимосларга қарамай, жарлик четидан кетишдан бош тортган. Воқеанинг айрим лаҳзалари атрофда тўпланган одамлар томонидан видеога олинган.

Тахминан соат 13:00 атрофида Куналнинг отаси Мурлидҳар Чандгуде ўғлига яқинлашиб, уни ортга тортишга уринган. Бироқ ҳар иккиси мувозанатини йўқотиб, жарликка қулаб тушган. Ўғли ва турмуш ўртоғининг йиқилганини кўрган онаси Сангита ҳам кўп ўтмай жарликдан қулаган. Учовининг ҳам ҳаётини сақлаб қолишнинг имкони бўлмаган.

Полиция марҳумларнинг жасадларини олиб чиқиб, суд-тиббий экспертизасига юборган. Ҳодиса юзасидан иш қўзғатилган ва тергов давом этмоқда.

Расмий маълумотларда фожиага бевосита туртки сифатида iPhone учун тўлов масаласидаги оилавий можаро кўрсатилмоқда. Бироқ полиция воқеанинг бошқа эҳтимолий сабабларига оид тафсилотларни ҳозирча ошкор қилмаган.